Бүгүн -- Тыа сирин дьахталларын Аан дойдутааҕы күнэ, сарсын -- Саха Сирин ийэлэрин күнэ. Онон ситимнээн, мин бүгүн биһиги нэһилиэккэ олорор биэс оҕолоох ыал ийэтэ, Саха Өрөспүүбүлүкэтин тыатын хаһаайыстыбатын туйгуна, “Орто-Амма нэһилиэгин социальнай-экономическай сайдыытыгар кылаатын иһин” уонна Орто-Амма нэһилиэгин “Күн күбэй Ийэ" бэлиэлэрин туһааннаҕа Александра Татаринова туһунан билиһиннэриэхпин баҕарабын.
Кини Нам Бөтүнүттэн төрүттээх. Кыра сааһыттан төрөппүттэригэр көмөлөһөн, дьиэ ис-тас үлэтигэр сыста улааппыта. Төрөппүттэрэ Шура оскуолаҕа үөрэнэ сырыттаҕына, ыалдьан олохтон туораабыттар. Оскуоланы бүтэрээт, маҕаһыыҥҥа продавеһынан үлэлээбит. 1983 с. Таатта Чычымаҕыттан төрүттээх Василий Константинович Татариновы көрсөн ыал буолар уонна Харбалаахха олохсуйа кэлэллэр. Манна идэтинэн продавецтаабыт, онтон сопхуос иистэнэр сыаҕы арыйбытыгар, онно түүлээҕи тигэр сыахха үлэлии киирбит. Александра Гаврильевна удьуор иистэнньэҥ. Ийэтинэн эһэтэ уус эбит, кыыһыгар бэйэтэ дьиэ тутан биэрбит, өссө ис тэрилин барытын оҥорбут, ол дьиэ билигин да турар үһү. Шура ийэтэ иистэнньэҥ, аҕатын батан иллэҥ кэмигэр уһанар эбит.
Александра Гаврильевна сыахха үлэлии олордоҕуна, сопхуос дириэктэрэ Дмитрий Васильевич Саввин ыанньык пиэрмэтигэр биригэдьииринэн анаабыт. Дьэ онтон ыла Александра Гаврильевна биир да өрөбүлэ суох үлэ үөһүгэр түспүтэ, үлэни кыайа-хото туппута. Тиэхиньикэҕэ сыһыаннаах буолан, матассыыкыл биитэр массыына уруулугар олордо да, кыстыгынан-сайылыгынан сылдьан үлэни барытын быһаарара.
Сопхуос эстибитигэр кэтэх ынахтарынан биирдэм хаһаайыстыба тэриммитэ улаатан-кэҥээн, “Хочо” ТХПК буолан үлэлии-хамсыы турар. Кэпэрэтииби Василий Константинович салайар. Билигин сүөһү иитэр комплексы туттаран, үлэ үөһүгэр сылдьаллар. Нэһилиэк дьонугар көмөлөһөллөр, ол курдук, туох эмит кыһалҕаланан, холобур, балыыһаҕа эмтэнэ барар дьон, сүөһүтүн ылан көрөллөр. Кэпэрэтиип ыанньыксыттара бары оскуоланы бүтэриэхтэриттэн пиэрмэҕэ үлэлээбиттэрэ, бары “Саха Өрөспүүбүлүкэтин тыатын хаһаайыстыбатын туйгуннара". Бары олус иллээхтэр, көхтөөхтөр. Кэлэктиибинэн сир астыыллар, арааһы иистэнэллэр-тигэллэр, оҥороллор, быыстапкалыыллар. Александра Гаврильевна көҕүлээһининэн, бырааһынньыктары араас тиэмэлээн ыыталлар, онно урут пиэрмэҕэ үлэлээбит бэтэрээннэри ыҥыран ыалдьыттаталлар, сынньаталлар.
Александра Гаврильевна үлэтиттэн быыс булан, нэһилиэк уопсастыбаннай олоҕор көхтөөхтүк кыттар. 2021 с. өрөспүүбүлүкэтээҕи “Далбар Хотун" күрэххэ ситиһиилээхтик кыттан, Тааттатын ааттаппыта. Төрөппүт кыргыттара дьоннорун удьуордаан иистэнэллэр, уһаналлар, араас быыстапкаларга кытталлар.
-
10
-
5
-
0
-
0
-
0
-
0
