Оробуочай сырыы Ойуунускай пааматынньыгар сүгүйүүттэн саҕаламмыта. Онтон улуус дьаһалтатыгар улахан мунньах буолла.
Кэпсэтии сүрүннээн олохтоох бэйэни салайыныы тэрээһинигэр киирээри турар федеральнай сокуон бырайыагын тула барда. Баһылык Михаил Соров: “Олохтоох бэйэни салайыныы федеральнай сокуонугар балайда улахан уларыйыылар киирэр буоллулар. Хайа баҕарар саҥа хамсааһын сэҥээриини сэргэ сэрэхэчийиини, сороҕор дьиксиниини, элбэх ыйытыгы, боппуруоһу үөскэтэр. Биһиги бу сокуон тула нэһилиэк баһылыктарын, дьокутааттарын кытары кэккэ мунньахтары ыыппыппыт, этиилэри истибиппит. Онтон бүгүҥҥү мунньах кэннэ ырытыһан, истэн баран, биир санааҕа кэлэр инибит диэн сэрэйэбин», -- диэн эттэ.
Ил Түмэн бэрэссэдэтэлэ Алексей Еремеев үлэөит бастыҥнарыгар -- “Кэскил” бааһынай хаһаайыстыба баһылыга Николай Дмитриевич Протопоповка уонна “Победа” хаһаайыстыба ыанньыксыта Иван Иванович Павловка -- Махтал суругун туттарда.
Нэһилиэк баһылыктара, дьокутааттара ууну хаһааныы, сири нүөлсүтүү, бэйдиэ ыттары тутан хаайыы, ходуһа сирдэрин чөлүгэр түһэрии курдук сытыы боппуруостарга бэйэлэрин санааларын үллэһиннилэр, оробуочай бөлөххө ыйытыылары биэрдилэр, туруорсууларын эттилэр. Ол курдук, Дьохсоҕон нэһилиэгин баһылыга Петр Захаров Таатта улууһа биир быыбардыыр уокурук буоларын ситиһэргэ диэн этиитин бука бары өйөөтүлэр.
Ил Түмэн дьокутааттарын бөлөҕө Харбалаахха “Төлөн” таас чох карьерыгар, Боробул “Победа” тыа хаһаайыстыбатын кэпэрэтиибигэр, Уолбаҕа, Томторго сырыттылар.
-
0
-
0
-
0
-
0
-
0
-
0
