Саха Өрөспүүбүлүкэтин дэлэгээссийэтэ быыстапка бары тэрээһинэригэр көхтөөхтүк кытынна, барыта 37 (18 кыһыл көмүс, 8 үрүҥ көмүс, 11 боруонса) мэтээлинэн бэлиэтэннилэр. Ол курдук, Тыа хаһаайыстыбатын билим чинчийэр үнүстүүтүн дэлэгээссийэтэ саҥа арыйыыларын сырдатан, 5 мэтээли ылла. Ол иһигэр, 3 кыһыл көмүс мэтээлинэн ирбэт тоҥноох хотугу сиргэ сүөһү сүмэһиннээх аһылыгын (биогельм диэн таба уонна сылгы аһылыктарын эбииликтэрин) бэлэмнээһин технологиятыгар, сиилэһи оҥоруу көдьүүстээх технологиятыгар бэлиэтэннилэр.
«Тыа хаһаайыстыбатын бастыҥ потребительскэй кэпэрэтиибэ» куонкуруска Р.А. Иванова аатынан «Сырдык аартык» кэпэрэтиип (Сунтаар улууһа) кэтэх хаһаайыстыбараы кытары тэрээһиннээх үлэтин иһин кыһыл көмүс мэтээлинэн сыаналанна. Кэпэрэтиип 2009 с. тэриллэн үлэлиир, күн бүгүн хас да нэһилиэгинэн 1000 ынах сүөһүлээх, бэйэтин иһинэн астыыр салааны тэринэн, үүтү-эти астааһыҥҥа үлэлир, нэһилиэнньэҕэ сүөһүнү көрүүгэ, идэни дьаһайыыга өҥө оҥорор.
Мэлдьи да буоларын курдук, агрооскуолалар үлэлэрэ эмиэ ситиһиилээх түмүктэннэ. Быыстапкаҕа кыттыбыт 10 агрооскуола 11 кыһыл көмүс, 6 үрүҥ көмүс уонна 8 боруонса мэтээлинэн наҕараадаланнылар! Амма улууһуттан Абаҕа, Амма 1 №-дээх, Бөтүҥ, Ньурба улууһуттан Антоновка, Бүлүү улууһуттэн Бөкчөҥөө, Чурапчы улууһуттан Одьулуун уонна Сылаҥ, Хаҥалас улууһуттан II Малдьаҕар оскуолаларын, Дьокуускай куораттан «Айыы кыһатын» уонна 40 №-дээх орто оскуола илдьбит арас бородууксуйалара үрдүктүк сыаналаннылар. Бу туһунан Тыа хаһаайыстыбатын уонна ас-үөл бэлиитикэтин министиэристибэтин пресс-сулууспата иһитиннэрэр.
Хаартыскаҕа: Сенатор Егор Борисов өрөспүүбүлүкэ дэлэгээссийэтин чилиэннэрин кытары элбэҕи сэһэргэстэ (ТХАҮөБМ МАХ ханаала).
-
2
-
0
-
0
-
0
-
0
-
0
