57 киилэҕэ диэри ыйааһыҥҥа Алексей Копылов кыайыылаах буолла. Финалга биир дойдулааҕын Дьулустан Федотовы бигэтик кыайда.
61 киилэ ыйааһыҥҥа диэри Александр Авелов үрүҥ көмүс, Ньургун Терентьев боруонса мэтээл хаһаайыттара буоллулар.
125 киилэ ыйааһыҥҥа диэри күөн көрсүһүүгэ Никита Хабаров үрүҥ көмүс мэтээллэннэ.
Бэҕэһээ, ыам ыйын 9 күнүгэр, Саха Сирин хамаандата эбии үс мэтээлинэн наҕараадаланна. Станислав Свинобоев дойду чөмпүйүөнэ үрдүк ааты сүктэ. Кини бэйэтин ыйааһыныгар (74 кг диэри) бигэтик финалга киирэн Динислав Болурову хотто.
Финалга былырыыҥҥы чөмпүйэнээт кыайыылааҕа Никита Софронов таҕыста (92 кг диэри). Быйыл кини үрүҥ көмүс мэтээл хаһаайына буолла. Быһаарар киирсиигэ Дагестан бөҕөһүгэр Абдул Абдулгасановка кыайтарда. Оттон 97 киилэҕэ диэри ыйааһыҥҥа Максим Толмачев иккис буолла.
Чөмпүйэнээт түмүгүнэн Саха Сирин хамаандата иккис бочуоттаах миэстэҕэ таҕыста. Хамаанда уопсайа 9 мэтээллээх, ол иһигэр 2 кыһыл көмүс, 5 үрүҥ көмүс уонна 2 боруонса. Маҥнайгы миэстэни 14 мэтээллээх (6-1-7) Дагестан хамаандата ылла. Чечня уонна Алания хамаандалара түөртүү мэтээллээхтэр.
- 0
- 0
- 0
- 0
- 0
- 0