Бэбиэскэҕэ киирбитинэн, эрэгийиэннэргэ миэдиктэр уонна учууталлар тиийбэттэрин, ол иһигэр ордук тыа сиригэр тиийбэт төрүөттэрин ырыттылар. Каадыр боппуруоһун хайдах быһаарары, уопсастыбаҕа саамай ирдэнэр идэлэр суолталарын көтөҕүүнү толкуйдаатылар.
Тыҥаан турар кыһалҕаҕа бэйэлэрин санааларын тустаах кэмитиэттэр салайааччылара, Судаарыстыбаннай Дуума фракцияларын бэрэстэбиитэллэрэ үллэһиннилэр.
Госдуума бэрэссэдээтэлэ Вячеслав Володин каадырынан хааччыллыы боппуруоһа бары өттүнэн үөрэтиллиэхтээҕин, быһаарыы чиҥник ырытыллан эрэ баран ылыллыахтааҕын эттэ. Кини бэлиэтииринэн, үөрэҕирии хаачыстыбата дойду сайдыытыгар сүҥкэн улахан оруоллаах.
Доруобуйа харыстабылын миниистирэ Михаил Мурашко: “Мэдиссиинэҕэ каадырынан хааччыйыы ордук элбэх үбү ирдиир. Мэдиссиинэ үлэһиттэрэ хайдах усулуобуйаҕа, балаһыанньаҕа үлэлииллэрин эмиэ учуоттуохтаахпыт. Оччотугар эрэ ыччат интэриэһэ үрдүөҕэ”, - диэтэ. Кини этэринэн, быраас аныгы технологиялары туһанан, табыгастаах усулуобуйаҕа үлэлиэхтээх. Испиэсэлиистэри олохсутууга уонна эдэр каадырдар үлэни талалларыгар бу сүрүн көрдөрүү буолуоҕа.
Ил Түмэн Доруобуйа харыстабылыгар сис кэмитиэтин бэрэссэдээтэлэ Светлана Давыдова Бырабыыталыстыба чааһын түмүгүнэн бэлиэтээбитинэн, интернатура саҥардыллыбыт көрүҥүнэн киириэхтээҕэ кэскиллээх дьыала. Маны сэргэ, элбэх быраас уонна мэдиссиинэ сиэстэрэтэ амбулаторияларга төннүөхтээҕэ эмиэ үтүө өрүттээх буолуоҕа.
Үөрэх эйгэтигэр каадыр боппуруоһун ырытыыга Андрей Пудов иһитиннэрбитинэн, 50 саастарыттан үөһээ саастаах педагогтар ахсааннара дойду үрдүнэн 43 % кэриҥэ буолар. “Санатан эттэхпинэ, мэдиссиинэ уонна үөрэх үлэһиттэрэ биэнсийэҕэ эрдэ тахсаллар, ону учуоттаан суоттаатахха эбии 480 тыһыынчаттан тахса киһи тиийбэт. Бу үөрэҕирии бары эйгэтин хаптахха, ол иһигэр уһуйааннарга, оскуолаларга, эбии, орто уонна үрдүк үөрэх кыһаларыгар”, - диэн толорон эттэ.
Сылын ахсын үөрэх эйгэтигэр 100 тыһыынчаттан тахса каадыр бэлэмнэниллиэхтээх, олор истэригэр 40 тыһыынча оскуола учуутала диэн үлэ уонна социальнай харысхал миниистирэ эттэ.
Сергей Кравцов педагогтар квалификацияларын үрдэтии уонна эбии бэлэмнээһин судаарыстыбаннай тэрилтэлэргэ эрэ ыытыллыахтааҕын туһунан сокуон барылын өйүүрүн эттэ. Маны сэргэ, бюрократическай ноҕорууска намтыахтаах. Кулун тутар 1 күнүттэн иитээччилэр, учууталлар уонна преподователлэр толоруохтаах докумуоннарын кэрискэтэ бигэргэммит. “Эрэгийиэннэргэ туһаайан бэлиэтээтэхпинэ, сокуон олоххо киириэхтээх, биһиги бэйэбит өттүбүтүттэн учууталлар бырааптарын көмүскүөхпүт. Санатан эттэххэ, учууталлар биэс, кэллиэстэр алталыы докумуону толоруохтара”, - диэн эттэ.
Хаартыска: Ил Түмэн пресс-сулууспата
-
0
-
0
-
0
-
0
-
0
-
0
