Уолбут нэһилиэгэр кууруссаны иитиинэн хас да ыал ылсан дьарыктанар. Олортон биир бастакынан Надежда Мыреева буолар. Надежда Гаврильевна кууруссаны иитии туһунан бу курдук сэһэргиир:
— Мин кууруссаны иитиинэн 90-нус сыллартан дьарыктанабын. Онтон кылгас тохтобул кэнниттэн уонча сыллааҕыта эмиэ дьарыктанан саҕалаабытым. Бастаан саҕалыырбар инкубатор ылынан, сымыыты сакаастаан, 20-чэ хонук бүөбэйдээн таһаарарым. Сымыыттан саҥа тахсыбыт кырачаан чоппуускалары көрөр-харайар эмиэ сүрдээх үлэлээх буолар. Кинилэри кыра оҕо курдук ас астаан аһатаҕын, сылааска, сырдыкка тутаҕын, уҥуох ыарыыта буолбатын диэн битэмиин биэрэҕин. Билигин 15 төбө баар, биир бөтүүктээхпин. Тыа хаһаайыстыбатын министерствота хоту уонна Арктика улуустарыгар түргэнник ситэр дьэ көтөрүн аҕалар өйөбүл бырагыраамматынан кэнники 10 кууруссаны ылбытым. Билигин кууруссаҕа бэйэтигэр баттатан таһаарарга үлэлэһэ сылдьабын.
Хаһаайка бу күҥҥэ кууруссаларга бурдуктарын, астарын аҕаларга уустуктары көрсөрүн, быйыл аҕалтарар бурдуктарын нуормата аччаабытын эттэ. Төһө да ыарахаттар баалларын иннигэр, Надежда Гаврильевна санаатын түһэрбэккэ, улахан дьиэ кэргэнин, чугастааҕы ыалларын сибиэһэй сымыытынан күндүлүү олорор. Кини холобурунан нэһилиэккэ хас да ыал кууруссаны иитэр. Ол курдук Уолбукка тыа хаһаайыстыбатынан дьарыктанар элбэх оҕолоох ийэ Елизавета Кононова иллэрээ сыл саха ынаҕын Ньурба курдук ыраах сиртэн тиэйэн аҕалан турардаах, ону таһынан куурусса иитэр уонна быйылгыттан бэйэтин баҕатынан, үбүнэн кус, хаас, индюк сымыыттарын сакаастаан, инкубаторга таһаарар баҕалаах. Үтүө саҕалааһын үтүө түмүктээх буолуо диэн эрэнэбит.
Хоту дойду хорсун хаһаайкаларын холобурунан быйыл элбэх оҕолоох ийэ Ольга Копырина социальнай харалта өйөбүлүнэн хантыраак баттаһан эмиэ бу хайысхаҕа ылсан, бэйэ хаһаайыстыбатын тэринэн эрэр. Уопуттаах дьон киниэхэ сүбэ-ама, күүс-көмө буолаллар.
Лариса СЛЕПЦОВА.
-
0
-
0
-
0
-
0
-
0
-
0
