Сэргэй Баһылайап иннинэ оҕоҕо анаан олоҥхо суруйбут бэйиэт да, суруйааччы да суоҕа диэн этэллэр. Оҕолорго анаан кини 6 олоҥхону суруйбут. Бэйиэт инникини өтө көрөн, кэскили өйдөөн, ийэ тыл туһугар кутун-сүрүн уһугуннаран туран үлэлээбитин билигин өйдүүбүт. Үөлэн Хардааччы — айыы бухатыырын аата. Орто уонна улахан саастаах оҕолорго аналлаах олоҥхону бэйиэт Сэргэй Баһылайап олоҥхоһут Тиихээн бастыҥ олоҥхотуттан суруйбут айымньыта буолар.
Сүрүн оруолу VII кылаас үөрэнээччитэ Айсен Диодоров кыайа-хото оонньоото. Олоҥхону аныгылыы тыыннаан, сүрүн идиэйэтиттэн халыйбакка, билиҥҥи олоҕу кытта ситимнээн туруорбуттарын сэҥээрдим, биһирээтим. Олоҥхо тыаһа-ууһа, муусуката тыыннаах доҕуоһуолунан толорулунна. Оҕолор сиппит-хоппут артыыстар курдук оонньуулларыттан сөхтүм. Бу тутталлара-хапталлара чопчутун, саҥараллара-иҥэрэллэрэ чуолкайын, киһи биир тыынынан көрөр испэктээҕин бэлэмнээн туруорбуттар. Бөлөҕүнэн толорор оҕолортон биирдиилээн сайдан, олоҥхоҕо дириҥник сыстан, соҕотоҕун да толорор оҕолор тахсан кэлиэхтэрэ.
Аныгы кэм балысхан сайдыыта күннэтэ уларыйыылары аҕала турар кэмигэр оскуола дириэктэрэ Калиста Афанасьева, олоҥхону туруорааччы муусука уонна саха литэрэтиирэтин учуутала Татьяна Давыдова, оскуола кэлэктиибэ, төрөппүттэр дьоһуннаах сайдар суолу тутуспуттар. Олоҥхо тыйаатырын кытта бииргэ үлэлииргэ олук уурбуттара бигэ кэскиллээх дьыала буолбут. Бу хайысханы оҕоҕо кэрэхсэтэн, кэнчээри ыччаппыт бэйэтин омугунан киэн тутта улаатарыгар, бастатан туран, оҕо төрөөбүт тылын, тылларын саппааһын сайыннаралларыгар, сахаларынан киэн тутта улааталларыгар тиһиктээх үлэни ыыталлара көстөр. Олоҥхону көрө олорон оҕолорго, төрөппүттэргэ, оскуола кэлэктиибигэр уонна Олоҥхо тыйаатырын режиссердарыгар, бэйиэт Сэргэй Баһылайапка — Бороҕуонускайга ис-искиттэн махтанан кэлэҕин уонна сахабыт тыла билиҥҥи көлүөнэ оҕолорго сайдар кэскиллээҕиттэн үөрэҕин.
Уйбаан УЙГУУРАП, ааптар хаартыскаҕа түһэриитэ
-
0
-
0
-
0
-
0
-
0
-
0
