Оҕо сайынын туһалаахтык атаарарыгар улууска сайыҥҥы лааҕырдар үлэлэрин саҕалаатылар. Кинилэртэн биирдэстэрэ Амма Наахара нэһилиэгэр “Үнүгэс” лааҕыр буолар. Быйыл манна оҕолор түөрт хайысханы талан сынньаныахтара. Ол курдук Н.С. Захаров-Сахаачча аатынан Амматааҕы оҕо спортивнай оскуолатыттан бастыҥ тренердар Валерий Гаврильев дуобакка, Василий Максимов тустууга дьарыктыахтара. Маны сэргэ Ольга Иванова-Сидоркевич аатынан Оҕо сайдар киинин эбии үөрэхтээһиниттэн ырыа-үҥкүү куруһуога үлэлиир. Эдэр кэскиллээх үлэһиттэр Лилиана Ефремова, практиканнар Юлианна Абрамова, Ньургустаан Гермогенов араас тэрээһиннэри ыытан эрэллэр.
Быйыл 13 сылын үлэлиир Светлана, Егор Неустроевтар тэрийбит “Тулуйхан” ырыа филиалын лааҕырыгар 15 оҕо таһыттан сылдьан дьарыгын саҕалаата. Дьарыгы уопуттаах уһуйааччы Светлана Егоровна Неустроева иилиир-салайар. Минньигэс астаах повар Матрена Гермогенова, ыраас тутуулаах туруу үлэһит Елизавета Устинова оҕо туһа диэн күннэтэ кыһаллан үлэлииллэр. Оҕолор доруобуйаларын Мария Макарова көрөр-истэр. Лааҕыр оҕолоро тиэргэн сибэккитин, итиэннэ соторутааҕыта олордуллубут дьаабылыка маһын кэтээн көрөллөр, уу куталлар.
Ирина КОРЯКИНА-ОЛЕСОВА
-
0
-
0
-
0
-
0
-
0
-
0
