Мунньаҕы улуустааҕы Култуура департаменын салайааччыта Розалия Тихонова салайан ыытта. Улуус баһылыгын социальнай боппуруоска солбуйааччы Наталья Петрова, СӨ норуоттарын IX Спортивнай оонньууларын дириэксийэтин бэрэссэдээтэлэ Артур Яковлев, нэһилиэк баһылыктара, култуура үлэһиттэрэ кыттыыны ыллылар.
Мунньах сүрүн сыалынан Ньурба дьонугар үйэлэргэ умнуллубат Спортивнай оонньуулар тэрээһиннэрин эрдэттэн былааннаан тэрийэргэ, туох-ханнык үлэ барыахтааҕын тула кэпсэтии барда.
Розалия Тихонова:
— Бу улахан тэрээһиннэргэ Октябрьскай нэһилиэк пааркатын, Нюрбинканы, Бүлүү эбэни, Ньурбаҕа Амакинскай экспедиция төрүттэммитинэн балары толору туһаныахтаахпыт, — диэн сыал туруорда.
Артур Янович ааспыкка хамыыһыйа састаабын бигэргэтиигэ анаан мунньах ыытыллыбыт буоллаҕына, хас биирдии хайысханан хамыыһыйалары тэрийэн, тэрээһин кэмитиэтигэр киирбит этиилэр сорук быһыытынан боротокуолланан бэлэм буолуохтаахтарын туһунан эттэ. Атырдьах ыйын 20-тин кэнниттэн Спортивнай оонньуулары ыытарга тэрийэр кэмитиэт бэрэссэдээтэлэ, Саха өрөспүүбүлүкэтин Бырабыыталыстыбатын Бэрэссэдээтэлин солбуйааччы Сергей Местников инники соруктар, былааннар тустарынан билсэ кэлиэхтээҕин туһунан иһитиннэрдэ. Маны сэргэ спорка сыһыаннаах кинигэ тахсарыгар былаанын билиһиннэрдэ.
— Ньурба сайдыылаах, аныгылыы көрүҥнээх буоларын туһугар нэһилиэктэрбитин тупсаран оҥоруу үлэтэ билиҥҥиттэн саҕаланарыгар хамыыһыйалар тэриллэннэр үлэ барыахтаах. Арассыыйаттан саҕалаан элбэх ыалдьыттар кэлэллэрэ былааннанар, онно биир дойдулаахтарбыт ыалдьыттары дьоһуннук көрсөрдүү тэриниэхтээхпитин туһунан чопчулаан эттэ.
Наталья Петрова Спортивнай оонньуулар буолар нэһилиэктэригэр култуурунай бырагыраама ылыллан, үлэ барыахтааҕар тохтоото:
— Биһиги сүрүн сорукпутунан култуурунай тэрээһиҥҥэ норуот күннээҕи олоҕун көрдөрүү таһынан, искусство үрдүк чыпчаалын көрдөрүүгэ дьулуһуохтаахпыт, биһиги уратыбыт онно сытар, — диэн тоһоҕолоото.
Чаппанда нэһилиэгин баһылыга Краснослав Бухолов Тааттаҕа ыытыллыбыт «Манчаары оонньуулара» XII Cпартакиада туһунан кэпсээтэ уонна бэйэтин санаатын үллэһиннэ:
— Куораты, нэһилиэги тупсаран оҥорууга биир өҥнөөх матырыйааллары туттарга этии киллэрэбин. Инники ыытыллыбыт тэрээһиннэр улахан тутуулара федеральнай үбүнэн, атын эбийиэктэр тутууларын бырайыактарын нэһилиэнньэ истиитигэр эрдэттэн таһаараннар спонсортство быһыытынан үбүлэнэн тутуллубуттар. Онон норуот күүһүн күүскэ түмэр, туһанар туһугар, иһитиннэрэр-биллэрэр үлэ эрдэттэн барыахтаах.
Чаппанда нэһилиэгэр спортивнай саала тутуута саҕаланна. Ааспыт сырыыга Дьокуускай куораттан эксперт Ирина Дмитриевна Алексеева советник быһыытынан кэлэн сүбэ-ама биэрэн барда. Улуу Сыһыыга Ньурбакаан дьоно мантан төрүттэммиттэрин көрдөрөр монумент оҥоһулларыгар Ирина Дмитриевнаҕа санаабын тиэрдибитим. Спортивнай оонньууларынан сибээстээн, 2026 сылга Пааматынньыктары харыстыыр управление Чаппандатааҕы таҥара дьиэтин чөлүгэр түһэриигэ аахсыйа ыытарга үлэлэһэргэ үлэ барыахтаах, — диэтэ.
Дьиикимдэ нэһилиэгин баһылыга Осипов Прокопий футболкаттан, олбохтон саҕалаан билиҥҥэттэн дизайнердар ылсан үлэлэһиэхтээхтэрин, Оонньуулар кэмнэригэр «күн-дьыл куһаҕан күнэ суох» диэн мээнэҕэ эппэттэринии, икки варианынан көрөн үлэ ыытыллыахтаах диэн санаатын эттэ.
IX Спортивнай оонньуулар дириэксийэтин бэрэссэдээтэлэ Артур Яковлев мунньахха сөптөөх этиилэр киирбиттэрин бэлиэтээтэ, кэлэр өттүгэр күүстээх бэлэмнэнии үлэҕэ бүттүүн турунарга ыҥырда.
Антонина Семенова, "Ньурба уоттара".
-
0
-
0
-
0
-
0
-
0
-
0
