Общество

Бэрэсидьиэн эҕэрдэлээтэ

От ыйын 22 күнүгэр РФ Коммунистическай баартыйатын эрэгийиэннээҕи салаатын пресс-кэмпэриэнсийэтэ ыытылынна. Бу тэрээһиҥҥэ СӨ Судаарыстыбаннай Мунньаҕын (Ил Түмэн) култуураҕа уонна киэҥник иһитиннэрэр-биллэрэр сириэстибэлэргэ сис кэмитиэтин бэрэссэдээтэлэ Виктор Губарев кыттыыны ылла.

Виктор Губарев КПРФ XIX сийиэһин түмүктэрин кылгастык билиһиннэрдэ. Баартыйа инники үлэтигэр тутуһар сыалларын, дойду кэскилигэр улахан суолталаах быһаарыылары сырдатта. Ол курдук, сийиэскэ Бэрэсидьиэн дьаһалтатын салайааччытын солбуйааччы Сергей Кириенко эҕэрдэлээтэ, Бэрэсидьиэн Владимир Путин аатыттан эҕэрдэ сурук аахта. Бэрэсидьиэн баартыйа дойду куттала суох буолуутугар уонна нэһилиэнньэ олоҕун күннээҕи боппуруостарын быһаарарыгар улахан суолталааҕын, көмөлөөҕүн, дьокутааттар таһаарыылаах, көдьүүстээх үлэлэрин бэлиэтээтэ. Бу дойдубут баһылыгын баартыйаҕа итэҕэлин туоһута буоларын эттэ.

Уопсастыба социальнай-экэнэмиичэскэй уонна култуурунай-духуобунай туругар капитализм кириисиһин охсуута ордук ыарыылаахтык бэйэтин биллэрэн эрэр. Виктор Николаевич бэлиэтээбитинэн, Арассыыйабыт утары аан дойду экэниэмикэтин прокси-сэриитэ буола турар. Украинаҕа уодаһыннаах быһыы-майгы Арассыыйа утары арҕаалар угаайыларынан, биһиги экэниэмикэбитин алдьатар, мөлтөтөр, коллапска киллэрэр сыаллаах ыытыллар. Маны биһиги утары туруохтаахпыт диэн ыҥырда.

Баартыйа аата уларыйда

Суруналыыстартан киирбит ыйытыктарга Виктор Губарев бэлиэтээбитинэн, баартыйа аатын уларытарга үлэ бара турар. Быһаарыы XIX сийиэскэ ылылынна. Инньэ гынан, билигин аата «КПРФ – политическая партия Коммунистическая партия Российской Федерации» диэн буолла. Бу иннинэ – «Коммунистическая партия Российской Федерации» диэн этэ.

Манна даҕатан эттэххэ, баартыйа бэрэстэбиитэллэрэ бигэргэтэллэринэн, быыбар кэмигэр “двойниктар” күөдьүйэн тахсаллар. Бу баартыйалар ааттарын “КПРФ” аатыгар ыкса чугаһата сатыыллара, быыбардааччылар истэригэр буккуйууну таһааран, норуот атын баартыйаҕа куоластарын биэрбиттэрэ бэлиэтэммит.

Баартыйаҕа саҥа салайар уорган – Үрдүкү Сэбиэт тэрилиннэ. “Үрдүкү Сэбиэт – биһиги чилиэннэрбит уопуттарын уонна муударастарын түмэн баартыйа норуодунай-патриотическай сойууһун бөҕөргөтүүгэ ылыллыбыт быһаарыы. Сүбэлэһэр уоргаҥҥа хомуньуустары сэргэ, баартыйата суохтар эмиэ бииргэ үлэлиэхтэрэ. Сэбиэккэ нэһилиэнньэҕэ халбаҥнаабат аптарытыаттаах сэбиэскэй уонна судаарыстыбаннай диэйэтэллэр киириэхтэрэ”, – диэн быһаарда.

Саҥа КПРФ Киин кэмитиэтигэр 207 чилиэн, 168 хандьыдаат, 37 ККРК чилиэннэрэ талылыннылар. Салайар уорган састааба 30 % саҥардылынна.

Устуоруйа чахчыларын сөргүтүү

“В.И.Ленин уонна И.В.Сталин ааттарын, оҥорбут үтүөлэрин умнууга хаалларбакка, сыыска-буорга түһэрбэккэ сөргүтэр сыаллаах үлэ барар. Кинилэр өҥөлөрүн, кэриэстэрин харыстыырга киирсэбит. Ол курдук, сийиэс кэмигэр Сталин оруолун хаттаан көрөн, Волгоград куоракка устуоруйаҕа хаалбытынан биллэр аатын төнүннэрэргэ ирдэбил туруорар туһунан этилиннэ. Дьокуускай куоракка Ленин болуоссаттыгар толору аатын хаалларар ирдэнэр. Билигин болуоссаттан аҥаардас пааматынньык уонна тротуар эрэ хаалла”, - диэтэ КПРФ эрэгийиэннээҕи салаатын салайааччыта.

Иосиф Виссарионович Сталин оруолун сыаналааһыҥҥа устуоруйаҕа сиэрдээх буолуу туһунан, ону тэҥэ русофобияны уонна антисоветизмы утары охсуһууга сийиэс резолюция ылынна.

“ССРС урусхалланыытын биир төрүөтүнэн Хрущев салайар кэмигэр Сталин аатын хараардыы буолбута дии саныыбыт. Кыайыы 80 сылын бэлиэтиир сылбытыгар бу улахан суолталаах Кыайыы хайдах кэлбитин туһунан ситэри этиллибэтэ. Кыайыы үрдүкү хамаандалааччы Иосиф Сталин салаайыытынан уонна Коммунистическай баартыйа өҥөтүнэн кэлбитэ. Устуоруйаны умнуу, атыннык ааҕыы, өйдөөһүн иэдээнинэн эрэ хаарыйар содуллаах буолар диэн бигэ санаалаахпыт. Ол түмүгэр аныгы кэмҥэ биһиги бырааттыы норуоттарбытын хаарыйда, утары туруортаата. Ол иһин бу боппуруостар көтөҕүллэллэр, биһиэхэ билигин устуоруйа дьиҥ чахчытын туруулаһыы, тириэрдии хаһааҥҥытааҕар да сытыытык турар. Ол туһунан КПРФ идиэйэлэрин Бэрэсидьиэммит Владимир Путин өйүүрүн бу сийиэскэ эмиэ биллэрдэ. Устуоруйаҕа чахчыта суох кыайыыны ситиһэр табыллыбат”, - диэн эттэ.

Сокуоннары көҕүлээһин

Сийиэскэ сокуоннары көҕүлээ­һини көрдүлэр. Ол иһигэр, сэрии оҕолорун өйөөһүн, демография, тыын суолталаах тэрилтэлэри национализациялааһын. Устуоруйа өйдөбүллэрин көмүскээһин баар буолуохтаах. “Русофобия, антисоветизм, пааматынньыктары атыннык ааттааһын уонна көтүрүү суох буолуохтаах”, – диэн туран, маннык дьайыыларга холуобунай эппиэтинэс сүктэриллэрин туһунан сокуон барылын бэлэмнээбиттэрин иһитиннэрдэ.

“ КПРФ бэйэтин суолун атын баартыйалары уонна хамсааһыннары сомоҕолуур, тэлээччи быһыытынан көрөр, үлэтин оннук ыытар”, - диэтэ. Сомоҕолоһуу куттала суох буолууга, боруоҥҥа кыайыы туһугар уонна дойдуну саҥа индустриализациялааһын тула барарын эттэ.

Оттон тыҥаан турар боппуруоска, олохтоох бэйэни салайыныы реформатыгар быыбардары оннунан хаалларга диэн санаатын үллэһиннэ.

Бэйэ оҥорон таһаарыытыгар өйөбүл

Виктор Николаевич бэлиэтээбитинэн, кини салгынынан ыраах эриэйстэргэ үксүн “Боиннарынан” көтөллөрүн, ону утарсарын 2014 сылтан эппитин санатта. Бу дойдубут үрдүнэн баар балаһыанньа. Көтөр ааллар биһиги авиахампаанньаларбыт бас билиилэригэр буолбакка, үксүн илиисин дуогабарыгар олохтонон туһаныллаллар. Өскөтүн арҕаа дойдулар Арассыыйа авиахампаанньаларын кытары сыһыаннаһыыларын тохтотор түгэннэригэр, тырааныспар систиэмэтэ кэһиллиэн, урусхалланыан сөп. Онон сиэттэрэн, суһаллык дойдуга авиация салаатыгар оҥорон таһаарыыны сөргүтэр уолдьаста диэн туруорсара.

Бу этиллибит билигин туолла. Виктор Николаевич этэринэн, тас дойдулартан атыылаһыллыбыт сөмөлүөттэргэ саппаас чаастары элбэх харгыстары көрсөн туран Кытай нөҥүө атыылаһарга күһэлиннибит. Сэбиэскэй кэмтэн биһиэхэ сөмөлүөттэри тутууга уруккуттан ордон хаалбыт үчүгэй өрүттэри ыһыктыбакка, бу сыллар тухары сайыннарыахтаах этибит диэтэ.

Боруоҥҥа бары күүһү

Анал байыаннай дьайыы кыттыылаахтарыгар өйөбүлгэ тохтоото. Бу боппуруос сийиэс сүрүн ис хоһоонунан буолбут, “Кыайыы бырагырааматын” тула элбэх кэпсэтии, ырытыы ааспыт. “Бырагыраама хомуньуус баартыйалар Сойуустарын салаатын, посольстволар уонна биэдэмэстибэлэр толору өйөбүллэрин ылла. Кинилэр бары сийиэс үлэтигэр кыттыыны ыллылар. Бырагыраама өйөбүлүгэр биэс посол тыл эттэ, Кытай, Куба, Вьетнам, Лаос уонна Кэриэйэ Үлэ баартыйатын салаайаачыларын ааттарыттан эҕэрдэлэри сэргэ өйөбүллэрин биллэрэллэрин туттубут”, - диэн эттэ.

Түмүккэ

Түмүгэр Виктор Губарев инники көлүөнэҕэ дойдуга бэриниилээх буолууга, ону кытта үтүө үгэстэргэ уонна устуоруйанан кэрэһэлэнэр дьоруойдуу быһыыга олоҕурар, инникигэ эрэллээх уопсастыбалаах судаарыстыбаны тиэрдээхтээхпитин эттэ. Онуоха күүстээх, ыарахаттартан чаҕыйбат былаас баар буолуохтаах. Маныаха КПРФ баартыйа бары ирдэнэр миэрэлэри ылыныаҕа, онуоха сөптөөх билиилээх, уопуттаах уонна кыахтаах дьоннордоохпут диэн эттэ.

Галина МАТВЕЕВА

Хаартыска: Галина Бочкарева