Кэбээйиттэн 20 киһилээх дэлэгээссийэ кытта кэлбитин туһунан дэлэгээт Николай Петрович Софронеев кэпсиир:
- Олус үчүгэй тэрээһиннээх, дириҥ суолталаах сийиэс ыытылынна диэн сыаналаатыбыт. Мин бастакы сийиэскэ сылдьан турардаахпын, онон тэҥнээн көрүүбүн үллэстиэм. Кэпсэтиилэри блоктарынан арааран, тыҥаан турар боппуруостары дьокутааттар ырытыыларыгар, истиилэригэр таһаарбыттара санаа атастаһарга олус табыгастаах буолла.
Саҥа сүүрээн быһыытынан, кэлбит дьокутааттар доруобуйаларын бэрэбиэркэлииллэригэр, биир сиргэ мустан анаалыстары туттаран, быраастарга көрдөрөн, сүбэлэтэр усулуобуйа тэрийбиттэрин биһирээтибит. Маныаха сийиэс саҕаланыан икки күн иннинэ буолан, мунньахтары куоттарбатыбыт. Маннык тэрээһин биһиги курдук ыраах улуустартан, кыра нэһилиэктэртэн кэлэр бэрэстэбиитэллэргэ олус табыгастаах. Үтүө үгэс буолан салҕанара буоллар диэн баҕа санаабын тиэрдиэм этэ.
Төгүрүк остуолларга мустан ирэ-хоро кэпсэттибит, санаа атастастыбыт. Мин тыа хаһаайыстыбатын уонна хомунаалынай хаһаайыстыба боппуруостарын ырытыыга сырыттым, санаабын эттим. Ол курдук, бөдөҥ улуустарга хомунаалынай хаһаайыстыба сорох боломуочуйаларын биэрдэхтэринэ, зоналарынан холбоһор табыгастаах буолуо. Биирдии улууһунан үлэни үмүрү тутар ыарахаттардаах дии саныыбын. Аҥаардас, атыылаһарга, атыылыырга ирдэбиллэр даҕаны кытаатан тураллар.
Ил Дархан Айсен Николаев сыл аайы оҥоһуллар Ил Түмэҥҥэ туһаайан этиитин истиэхпит. Салайааччыбыт ааһан эрэр сыл сүрүн түмүктэрин таһааран, өрөспүүбүлүкэ салгыы сайдыытын чугас уонна уһун кэмнээх стратегиятын торумнуоҕа, өрөспүүбүлүкэ парламенын, Бырабыыталыстыбатын уонна олохтоох салайыныы уорганнарын үлэтин сүрүн соруктарын туруоруо. Ону кытары сийиэс түмүктэрин сыһыары тутан үлэлиэхпит.
“Ил Түмэн”хаһыат ааҕаччыларыгар Саҥа дьылынан эҕэрдэбин тиэрдэбин. Кэлэр сыл быйылгытааҕар үгүс үтүөнү, үчүгэйи, кыайыыны, ситиһиини аҕаллын.
-
0
-
0
-
0
-
0
-
1
-
0
