Нам улууһун Искра нэһилиэгин баһылыга Андрей Григорьевич Новгородов:
-- Олус таһаарыылах, киэҥ ырытыылаах сийиэскэ сырыттыбыт. Мин Анал байыаннай дьайыы кыттыылаахтарыгар уонна кинилэр дьиэ кэргэттэригэр өйөбүл миэрэлэри ырытар төгүрүк остуолга сырыттым. Бу Сахабыт Сирин эрэ буолбакка, дойдубут олохтоохторун барытын долгутар, таарыйар боппуруос буолар. Маныаха биһиги өрөспүүбүлүкэбит олохтоохторо сомоҕолоохторун көрдөрөллөр, байыастарбыт кыргыһыы толоонугар бэйэлэрин дойдуларын аатын түһэн биэрбэттии хорсуннук киирсэллэр. Онон биһиги биир дойдулаахтарбытынан Арассыыйабыт дьиҥнээх патриоттара диэн киэн туттабыт.
Нэһилиэнньэбит, кырдьаҕастыын эдэрдиин биир сомоҕо буолан түмсэн, кырасдааныскай иэстэрин, уопсастыбаннай ноҕоруусканы чиэстээхтик толороллор. Ол курдук араас гуманитарнай көмө хомуллар, пуормалаах таҥас тигиллэр, саһыарар илимнэр өрүллэллэр уонна боруон маҥнайгы кирбиитигэр тиэрдиллэллэр.
Ыччаттарга анаан бу үтүө холобурдары умнубаттарын, өйдүү-саныы сылдьалларын туһугар үгүс тэрээһиннэр ыытыллаллар. Холобурдаан эттэххэ, биир дойдулаахтарбыт сырдык ааттарын үйэтитэр туһугар оскуолаларга «Дьоруой паарталара» туруоруллаллар. Маннык аахсыйалар оҕолору патриотическай тыыҥҥа иитэллэр, дойдуну таптыырга уонна үлэ, сэрии дьоруойдарынан киэн туттарга үөрэтэллэр
-
0
-
0
-
0
-
0
-
0
-
0
