—Кэргэним Намтан төрүттээх, оҕолоноро чугаһаан, үөс сиргэ киирэн, дьоммутун кытта бииргэ Саҥа дьылы бэлиэтээбиппит. Кини төрөөбүт дойдутугар Намҥа олоро, үлэлии сылдьыбыппыт. Билигин мин дойдубар Баатаҕайга олохсуйан олоробут, манна кэлбиппит 10-тан тахса сыл буолла. Бу бэһис оҕобут, — диир ыал аҕата Александр Петрович. Кини АГИКИ-ни бүтэрбит, идэтинэн Баатаҕайга С.П. Сивцев аатынан «Түмэн» норуот айымньытын дьиэтигэр уус-уран салайааччынан үлэлиир. Оттон Валерия Афанасьевна Баатаҕай тыа сирин түөлбэтин дьаһалтатыгар спортинструкторынан үлэлиир, бэйэтэ юрист идэлээх.
Элбэх оҕолоох дьиэ кэргэн улахан кыыстара Алгыстаана Кэптэни нэһилиэгин Лөгөйдөөҕү лицей-интернакка 6-с кылааска үөрэнэр. Айгылаана уонна Арылхан Н.Н. Тарскай аатынан Баатаҕай орто оскуолатын 2-с, 1-гы кылаастарын үөрэнээччилэрэ. Онтон Күбэйэ Баатаҕай нэһилиэгин «Күнчээн» оҕо уһуйаанын иитиллээччитэ. Кинилэр билигин бары кыра балтыланнылар.
Дьиэ кэргэнинэн нэһилиэк культурнай тэрээһиннэригэр көхтөөхтүк кытталлар. Ону сэргэ 2023 с. Өймөкөөн улууһугар тэриллибит «Олоҥхо Ыһыаҕын» көрсө уонна Ийэ тыл, сурук-бичик декадатын чэрчитинэн ыытыллыбыт «Ийэ тыл илгэтинэн-2023» олоҥхону толорууга өрөспүүбүлүкэтээҕи онлайн күрэххэ улахан кыыстара Алгыстаана Белолюбская 1 истиэпэннэх лауреат аатын сүкпүтэ, онно дьиэ кэргэнинэн С.С. Васильев-Борогонскай «Эрчимэн Бэргэн» олоҥхотуттан быһа тардыыны толорбуттара. Ити курдук ийэлээх аҕа оҕолорун талаанын, дьоҕурдарын сайыннарарга болҕомтолорун уураллар.
Саха итэҕэлинэн, Үрүҥ Аар Тойон сылыгар сырдыгы, сылааһы бэлэхтээн, оҕо эбиллэн үөрүү үктэллэммит, кэскил кэрэһэлэммит дьиэ кэргэҥҥэ этэҥҥэ буолууну, дьолу-соргуну, быр-бааччы олоҕу баҕарабыт.
Сонун төрдө уонна хаартыска: "Энсиэли"
Ааптар: Касьян Олесов-Олук
-
0
-
0
-
0
-
0
-
0
-
0
