Пленарнай мунньахха тыл этэригэр, Аграрнай үөрэхтээһин норуоттар икки ардыларынааҕы академиятын бэрэсидьиэнэ, тыа хаһаайыстыбатын билимин доктора, профессор Мария Трифонова тоҕо пуоруму ыытыыга Саха Сирэ талыллыбытын быһаарда:

«Саха Сиригэр бэтэринэриийэ  салаатыгар идэтийбит исписэлиистэри хаачыстыбалаахтык бэлэмнииллэр. Өрөспүүбүлүкэ бэтэринээринэй  сулууспата үрдүк компетенциялааҕынан, идэтигэр тапталынан уонна бэриниилээҕинэн биллэр, манна бэтэринээрдэр  династиялара бааллар. Саха испэсэлиистэрэ  бруцеллез, туберкулез, лейкоз курдук ыарыылары толору суох оҥорбуттара. Оттон Арассыыйаҕа соторутааҕыта тахсыбыт кутталлаах дьаҥ тарҕаныытын үс күн иһигэр суох гынан, Саха Сирин бэтэринээринэй быраастара  кыылы-сүөлү, ол аата киһини эмиэ быыһаатылар», — диэн бэлиэтээтэ Мария Трифонова.

Профессор Саха Өрөспүүбүлүкэтин Ил Дархана Айсен Николаевка уонна өрөспүүбүлүкэ Бырабыыталыстыбатыгар пуоруму тэрийиигэ көмөлөрүн иһин махтанна.

Пуорум сүрүн тиэмэлэрэ: бэтэринэриийэ мэдиссиинэтигэр  нанотехнологиялар уонна биотехнологиялар, антибиотиктары солбуйар биологическайдык актыыбынай эбиликтэр, инфекционнай уонна паразитарнай ыарыылары утары охсуһуу, экологическай уонна килиимэт фактордарын кыыл доруобуйатыгар дьайыыта, бэтэринээринэй каадырдары бэлэмнээһин.

Тэрээһин уратытынан билим-педагогическай каадырдар уонна аспираннар практикалыыр бэтэринээр быраастары кытта холбоһуктаах штабной үөрэҕи ааспыттара буолар. Саха Сирин бэтэринээрийэ сулууспатын сотрудниктарыгар квалификацияны үрдэтэр куурустар тэрилиннилэр, түмүктэринэн кинилэр Аграрнай үөрэхтээһин норуоттар икки ардыларынааҕы академиятын удостоверениеларын тутуохтара.

Пуорум бастакы күнүн сүрүн тэрээһининэн Аартыкатааҕы судаарыстыбаннай  агротехнологическэй үнүбэрситиэт , Аграрнай үөрэхтээһин норуоттар икки ардыларынааҕы академиятын, Саха Өрөспүүбүлүкэтин бэтэринэриийэҕэ управлениетын, Ураллааҕы судаарыстыбаннай  аграрнай үнүбэрситиэт  уонна «Доброздрав» ХЭО икки ардыларыгар бииргэ үлэлээһин туһунан меморандумҥа илии баттааһын буолла. Докумуоннар бэтэринэриийэ эйгэтигэр эрэгийиэннэр уонна нуоруоттар икки ардыларыгар хардарыта дьайсыыга саҥа кыахтары арыйаллар.

Пленарнай мунньах кэмигэр Мария Трифонова бастыҥ исписэлиистэргэ Аграрнай үөрэхтээһин норуоттар икки ардыларынааҕы академиятын академиктарын дастабырыанньаларын  туттарда.

Пуорум бэс ыйын 13 күнүгэр диэри ыытыллыаҕа. Кыттааччылар саҥа патогеннары, кыыллар ыарыылара үөскүүр кутталларын дьүүллэһиэхтэрэ уонна ас-үөл куттала суох буолуутун хааччыйарга быһаарыылары киллэриэхтэрэ.

Тэрээһин дойду бэрэсидьиэнэ  Владимир Путин көҕүлээбит «Ас-үөл куттала суох буолуутун технологическай хааччыйыы» национальнай бырайыагын, ону тэҥэ Саха Сирин Ил Дархана Айсен Николаев олохтоох оҥорон таһаарыыны  сайыннарар Стратегическай Ыйааҕын соруктарын толорууга туһуламмыт.

Сонун төрдө уонна хаарытска:
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата