-- Бүгүн Аан дойдутааҕы донор күнэ. Бэйэтин кыра да чааһын биэрэн, ким эрэ олоҕун быыһыыр туһугар үлэлэһэр дьон бырааһынньыктара. Хаан туттарыытын сулууспатыгар үлэлиир быраастар, сиэстэрэлэр уонна бары үлэһиттэр бырааһынньыктара. Мин хас биирдии хаан туттарбыт киһини эҕэрдэлиибин.
Мин өр сыл донордыыбын. Онтон ыла бу мин олоҕум биир чааһа. Биир туттарыы үс киһи олоҕун быыһыан сөп. Уҥуох силиитин донордарын регистрыгар эмиэ өр кэмнээҕитэ киирбитим. Саарбахтыыр дьоҥҥо этэбин: куттанымаҥ. Бу көннөрү вена хаанын ылыыта. Оттон кимиэхэ эрэ — тыыннаах хаалар соҕотох эрэл.
Соторутааҕыта «Арассыыйа бочуоттаах доноро» ааты тутан олус үөрдүм, наҕараада дууһаны сылаастыыр, кэннигэр – туһалаах буоларга үйэлээх үтүө үгэс турар. Эһиги өйөбүлгүт, эйэҕэс сыһыаҥҥыт уонна күн ахсын оҥорор сүдү үлэҕит иһин Хаан туттарар станция кэлэктиибигэр ис сүрэхпиттэн махтанабын.
Эһиги донор буолуоххутун баҕарар буоллаххытына - судургу инструкция:
- «Госуслуги» нөҥүө хаан туттарыытыгар суруйтарыҥ.
- Сарсыарда чэпчэки аһыыгыт, иннинээҕи күҥҥэ сыалаах-арыылаах уонна тумалаах астан аккаастанаҕыт. Хаан туттарар станцияҕа эбэтэр РБ№1-НЦМ тиийиҥ.
- Манна миэстэтигэр кыра медкөрүүнү ааһыҥ — анаалыстар, хаан баттааһына, хас да ыйытыылар.
- Хаан туттарыыта 10–15 мүнүүтэни ылар.
- 15–20 мүнүүтэ сынньаныҥ.
Бүттэ. Бу уустук буолбатах. Кутталлаах да буолбатах. Дьиҥ-чахчы дьон олоҕун быыһыыр. Кыттыһыҥ. Бүгүн саамай тоҕоостоох түгэн.
Биһигини кытта баар хас биирдии киһиэхэ махтал! Уонна бүгүн хорсун санааны ылыммыттарга эҕэрдэ!
Сонун төрдө уонна хаартыска: "Доктор Луцкан" МАХ ханаала
-
0
-
0
-
0
-
0
-
0
-
0
