РФ Бырабыыталыстыбатын Бэрэссэдээтэлин солбуйааччы Дмитрий Чернышенко Арассыыйа Үөрэҕириитин миниистирэ Сергей Кравцов, Судаарыстыбаннай Дуума дьокутааттара, эрэгийиэннэр баһылыктара уонна профильнай биэдэмистибэлэр бэрэстэбиитэллэрэ кыттыылаах 2026 сыл сайыҥҥы чэбдигирдэр хампаанньатын түмүктэрин таһаарар мунньаҕы ыытта.
Сайыҥҥы кэмҥэ Арассыыйаҕа 40 тыһыынчаттан тахса оҕо лааҕыра үлэлээбит, манна 6 мөлүйүөн кэриҥэ оҕо сынньаммыт, ол иһигэр уустук олохтоох балаһыанньаҕа сылдьар 1,4 мөлүйүөн оҕо. Төрөппүттэр сынньалаҥ хаачыстыбатын 5 баалтан 4,61 баалга сыаналаабыттар. 8,6 тыһыынча кэриҥэ инклюзивнай симиэнэ ыытыллыбыт, эрэгийиэннэр уонна муниципальнай бүддьүөттэртэн оҕо сынньалаҥар 86,7 миллиард солкуобайтан тахса үп көрүллүбүт.
Сүрүн түмүктэринэн — биэдэмистибэлэр икки ардыларыгар бииргэ үлэлээһини күүһүрдүү, федеральнай итии линияны үлэлэтии, оҕолорго мэдиссиинискэй арыаллааһын саҥа усулуобуйаларын уонна эрэгийиэннэри рейтиҥҥа таһаарыы буолла. Чукотка, Санкт-Петербург, Ставропольскай уонна Алтайскай кыраайдар, Челябинскай уонна Рязань уобаластара, Краснодарскай кыраай уонна Башкортостан лиидэрдэр кэккэлэригэр киирдилэр.
Сергей Кравцов этэринэн, сынньалаҥ тэрээһиннэринэн 10 мөлүйүөнтэн тахса оҕо хабыллыбыт, лааҕырдарга 283 тыһыынчаттан тахса анал байыаннай дьайыы кыттыылаахтарын оҕолоро сынньаммыттар. 2023 сылтан федеральнай бырагыраама чэрчитинэн 15 тыһыынчаттан тахса саҥа миэстэ тэриллибит, 136 эбийиэк өрөмүөннэммит уонна 336 эбийиэк тутуллубут. Сайын бу эйгэҕэ 680 тыһыынчаттан тахса исписэлиис үлэлээбит.
Саха Сиригэр
Саха Сиригэр сынньалаҥынан, чэбдигириинэн уонна дьарыктаах буолуунан 128 180 оҕо хабыллыбыт — бу өрөспүүбүлүкэ үөрэнээччилэрин уопсай ахсаанын 85%-на. Эрэгийиэн реестрыгар киирбит 475 сынньалаҥ тэрилтэтигэр 59 135 оҕо сылдьыбыт. Ол иһигэр:
- Күнүскү лааҕырдарга — 44 466 оҕо;
- Куорат таһынааҕы лааҕырдарга — 10 418 оҕо;
- Үлэ уонна сынньалаҥ лааҕырдарыгар — 2 436 оҕо;
- Палаточнай лааҕырдарга — 1 815 оҕо.
Өрөспүүбүлүкэ тас өттүгэр 16 992 оҕо сынньаммыт. Саха Сирин Үөрэҕирии уонна билим министиэристибэтинэн 327 оҕо ыытыллыбыт, ол иһигэр 13 Аартыка улуустарыттан 137 оҕо, анал байыаннай дьайыы кыттыылаахтарын дьиэ кэргэттэриттэн 128 оҕо уонна муниципалитеттартан 62 үөрэнээччи.
Өрөспүүбүлүкэҕэ федеральнай оҕо кииннэригэр — "Океан", "Орленок", "Смена", "Артек" уонна "Алые паруса" — 655 квота бэриллибит. Билиҥҥи туругунан 377 оҕо ыытылынна.
Сонун төрдө уонна хаартыска: "Минобрнауки Якутии" МАКС ханаала.
-
0
-
0
-
0
-
0
-
0
-
0
