Саха сирин устуоруйатыгар саҥа кэрдииһи олохтообут өрөспүүбүлүкэ судаарыстыбаннай суверенитетын туһунан декларация Михаил Николаев салайбыт XII ыҥырыылаах Саха ССР Үрдүкү Сэбиэтинэн 1990 сыл балаҕан ыйын 27 күнүгэр биллэриллибитэ: Саха АССР кубулуйан РСФСР уонна ССРС састаабыгар Саха Сэбиэскэй Социалистическай Өрөспүүбүлүкэ дэммитэ, оттон биир сылынан Саха ССР аата уларыйан Саха Өрөспүүбүлүкэтэ диэн буолбута.
Оҥорон таһаарыы, өй күүһүн, инбэстииссийэ улахан ис кыаҕын, айылҕа баайын бас билэн дойду экэниэмикэтин, үөрэҕин, наукатын уонна култууратын, доруобуйатын харыстабылын, бырамыысыланнаһын, социальнай эйгэтин бөҕөргөтүүгэ Саха Өрөспүүбүлүкэтэ Ил Дархан Айсен Николаев салайыытынан бүгүн сүҥкэн кылааты киллэрэр.
Судаарыстыбаннай Мунньах (Ил Түмэн) өрөспүүбүлүкэ социальнай-экономическай сайдыытын быраап өттүнэн төрдүн ситиһиилээхтик хааччыйар, эрэгийиэҥҥэ сокуону оҥоруу хаамыытын тупсарар. Ону кытта нэһилиэнньэ дьиҥнээх дохуотун халбаҥнаабат гына улаатыннарар, сири-уоту көдьүүстээхтик салайар, экэниэмикэ күрэстэһэр кыахтаах сүрүн салааларын эрчимнээхтик сайыннарар.
Быйыл күүтүллүбэтэх сааскы халааны көрүстүбүт: олорор дьиэлэр, ходуһалар, инфраструктура эбийиэктэрэ эмсэҕэлээтилэр. Эмсэҕэлээбит сирдэри чөлүгэр түһэриигэ, гуманитарнай көмөнү оҥорууга бүтүн өрөспүүбүлүкэ кыттыһар: ыксалынан оҥоһуллубут чахчы норуодунай ыстааптарынан сүрүннэммит хаһаайыстыба субъектара, уопсастыбаннай тэрилтэлэр уонна хамсааһыннар, амарах дьон. Суукка бириэмэтиттэн, сылайартан, уустуктартан иҥнибэккэ ыыппыт үтүө санаалаах үлэлэрин иһин волонтердарга, идэтийбит быыһааччыларга, суол, үөрэх үлэһиттэригэр, суоппардарга, тырахтарыыстарга, судаарыстыбаннай уонна муниципальнай сулууспалаахтарга ис сүрэхпиттэн махтанабын. Дьон ыккардыгар өйдөһүү, эрэнсии баар буоллаҕына, барытын ситиһиэххэ сөп. Өрөспүүбүлүкэбит, элбэх омуктаах норуоппут күүһүн итиннэ көрөбүн.
Күндү Сахам сирин дьоно! Судаарыстыбаннас күнүнэн эһигини истиҥник эҕэрдэлиибин! Барыгытыгар кытаанах доруобуйаны, дьиэ кэргэҥҥитигэр уйгуну, төрөөбүт өрөспүүбүлүкэбит уонна улуу Дойдубут – Россия чэчирии туралларын туһугар үтүө түмүктээх үлэни баҕарабын!
Алексей ЕРЕМЕЕВ,
Саха Өрөспүүбүлүкэтин Ил Түмэнин Бэрэссэдээтэлэ
-
0
-
0
-
0
-
0
-
0
-
0
