Бэртээхэй аахсыйаны “Биир ньыгыл Арассыыйа” баартыйа көҕүлээн тэрийэр. “История умнуллубат чахчыта” бырайыагын чэрчитинэн.
Саха сиригэр “История умнуллубат чахчыта” бырайыагы норуот дьокутаата Елена Голомарева сүрүннүүр.
--Биһиги өрөспүүбүлүкэбит Уһук Илиҥҥэ саамай элбэх былаһаакканы бэлэмнээтэ – 285 сиргэ Кыайыы диктанын суруйуохтара. Сахалин уобалаһа, Хабаровскай кыраай курдук улахан эрэгийиэннэр 40-50 былаһааккалаахтар. Онон Саха сирин олохтоохторо бу Улуу сэриигэ сүгүрүйэрбитин, олохторун толук уурбут дьоммутун кэриэстиирбитин, кинилэр хорсун быһыыларыгар махтанарбытын биллэрэбит.
Аны билигин ол былаһааккаларга кэлэн, бары күргүөмүнэн диктаны суруйуоҕуҥ. Онуоха муниципальнай тэриллиилэр, бибилэтиэкэлэр, мусуойдар, оскуолалар манна күүскэ ылсан үлэлэһэ сылдьаллар. Онон элбэх киһи кыттыа диэн эрэнэбит. Бу Кыайыы диктана бэйэтэ куонкурус. Бастыҥнар грамотанан, туоһу суругунан наҕараадаланыахтара.
Аны туран, онлайн киэбинэн эмиэ суруйуоххутун сөп. Маныаха Ыччат министиэристибэтин нөҥүө устудьуоннары хамсатан эрэбит. Кинилэр саастаах дьоҥҥо көмөлөһөн, диктантпобеды.рф саайка регистрациялаан биэрэллэр. Оччоҕо балаҕан ыйын 3 күнүгэр кинилэргэ сорудахтара төлөпүөннэригэр дуу, көмпүүтэрдэригэр дуу кэлэр, ону толорон ыыталлар.
Билигин да бириэмэ баар. Ити этиллибит саайка киирэн регистрацияланыҥ. Android уонна iOS платформаларга "Диктант Победы» мобильнай сыһыарыы оҥоһулунна, ону хачайдаан, төлөпүөҥҥүтүгэр туруоруоххутун эмиэ сөп.
Ким да умнуллубат, туох да умнуллубат. Улуу Кыайыы 75 сылынан Кыайыы диктаныгар көхтөөхтүк кыттыаххайыҥ!, -- диэн ыҥырар Елена Христофоровна.
-
0
-
0
-
0
-
0
-
0
-
0
