487 фашиһы суох оҥорбут бэргэн ытааччы Иван Николаевич Кульбертинов төрөппүт уола Иван Иванович уонна аймаҕа, Өлүөхүмэ улууһуттан Ил Түмэн дьокутаата, «Сахатранснефтегазсбыт» генеральнай дириэктэрин солбуйааччы Николай Иванович норуот дьоруойун туһунан киэн тутта кэпсээтилэр.
"Аврора" Крейсер ытаатын кытта күөх окко түспүтэ
Аҕа дойдуну көмүскүүр сэриигэ алта аатырбыт снайпердар бааллара, кинилэр кэккэлэригэр сахалар иккилэр Федор Охлопков уонна Иван Кульбертинов. Сэбиэскэй Сойууһу бүтүн аан дойдуга аатырдыбыт бэргэн ытааччы Өлүөхүмэ улууһун ыраах Тээнэ нэһилиэгэр 1917 с. сэтинньи 7-гэр, Өктөөп өрөбөлүүссүйэтин бэлиэ күнүгэр иккис оҕонон күн сирин көрбүтэ. "Аврора" Крейсер ытаатын кытта күөх окко төбөтүн оройунан түспүтэ диэн уола кэпсээнин саҕалыыр.
Өҥ буордаах Өлүөхүмэҕэ Токо өрүс тардыытыгар Чоруодаҕа, Чоруодакаан үрэххэ булчут Кульбертиновтар аҕа уустара тэнийэн олорбуттара. Бииргэ төрөөбүттэрэ төрдүөлэр, убайа Ньукулай, быраата Бүөтүр уонна балтылара Катя. Оҕолор кыра эрдэхтэриттэн тыаҕа улаатан, Уйбаан бултаан-балыктаан, бэйэтин кыанар уолу Пүмпээ диэн хос ааттаабыттара. Эбэҥки тылыттан сахалыы тылбаастаатахха, сытыы-хотуу, сылбырҕа диэн.
Пүмпээ эһэлээх-эбэтигэр олорон, биэс-алта сааһыттан булка сыстыбыта. Уол саас Чоруода төрдүгэр Кэбэркээн диэн сиргэ үгүс-үтүмэн улардары бултаан, дьиэтигэр таһар эбит. Кыайан сүкпэт буоллаҕына, соһон аҕалара. Элбэх тииҥи талаҕынан холбуу тиһэ баайталаан баран, эмиэ соһоро. Соһуллубут тииҥ түүтэ, тириитэ алдьанарын иһин эһэтэ итинник соһума, тииккэ ыйаан ис, ону бэйэм хомуйар буолуом диир эбит. Уол лаппа улаатан "Бастыҥ хардыы" холкуоска табаҕа үлэлээбит уонна булка сылдьыбыт. Сотору кэминэн чулуу булчут аатыран, бириэмийэтигэр таҥас-сап ылыммыт.
Убайа Ньукулай бастакы хомуурга сэриигэ баран Ленинград куораты көмүскүүргэ дьоруойдуу охтубута, ханна хараллыбыт сирэ биллибэт. Оччолорго Бүөтүр кыра оҕо буолан, балтытын кытта эбэлэригэр хаалан иитиллибиттэрэ.
Ааптар хаартыскаҕа түһэриитэ.
-
0
-
0
-
0
-
0
-
0
-
0
