«Өлүөхүмэ куоратыттан борохуотунан Өлүөнэ эбэни өрө устан истэхтэринэ, биир тайах өрүһү туораан эрэр эбит. Борохуот хапытаана: "Ким үчүгэйдик ытарый?" — диэбит. Онуоха аҕам “Мин!" диэбитигэр карабинын биэрбит. "Куотуо, ыта оҕус!" — диэн ыксаппыт. "Айдаарымаҥ, бэйэм билэбин", — диэбит аҕам уонна тайах кытылга чугаһыырын күүтэн, ытыахча ыппатах.
Онтон кэтээн туран, биирдэ ытан кэбиспит. Борохуот дьоно байдаарканан тахсан тайаҕы сүлэн, астаан-эттээн аҕалбыттар. Өскөтүн хапытаан эппитин курдук, аҕам тайаҕы өрүс ортотугар ыппыта буоллар, өлбүт тайах тимириэх, эбэтэр сүүрүк хоту уста туруох этэ», — диир төрөппүт уола Иван Иванович.
Уйбаан 1 Украинскай фроҥҥа сэриилэһэн истэҕинэ, сыалы сыыспакка табар бэргэн ытааччы уолу таба көрөн, өстөөҕү бултаһарга араас кутталлаах, сэрэхтээх сорудахтарга ыҥырыыттан ыҥырыыга сырытыннараллара. Кимэн киириигэ, ньиэмэс снайпера кэллэҕинэ Кульбертиновы тута ыҥыртаран ылаллара.
Түүн утуйа сыттаҕына кытта кэлэн илдьэ бараллара, ханна баран иһэрин бэйэтэ да билбэтэ, киниэхэ саһа сытар өстөөҕү суох оҥороҕун диэн сыал-сорук этэллэрэ. Онтон бэриллибит сорудаҕы толорбутун кэнниттэн, 10-20 хонугунан чааһыгар төттөрү аҕалаллара.
Иван Николаевич разведкаҕа сылдьара, ол быыһыгар снайпердары үөрэтэрэ. Кини албан аата хас күн ахсын сураҕыран испитэ. Аармыйаҕа тарҕанар хаһыаттарга сотору-сотору чулуу булчут, хорсун снайпер туһунан суруйаллара. Өстөөх снайпердара кинини эмиэ билэллэрэ, анаан-минээн бултаһа кэлэллэрэ. Ол күөн көрсүһүүгэ Кульбертинов мүччү-хаччы туттаран, куруук кыайыылаах тахсара.
Ньиэмэстэр бэргэн ытааччыны сойуолаһан, араадьыйанан: «Ахтунг, Кульберт!», — диэн биллэрэ тураллара. Фроҥҥа ньиэмэс снайпера кэллэ даҕаны, Иван Николаевиһы булан ылан, киниэхэ ыыталлара, бултата. Бэлэмнэнэн кэлбит утарсааччыны сойуолаһарга, кинини кыайарга саахыматтыыр курдук хас хардыыгын эрдэттэн суоттуур стратегическай, аналитическай өй наада.
Өстөөхтөр биһиги бэргэн ытааччыбытын суох оҥорорго сорудах ылан, анаан-минээн ох курдук оҥостон кэлэллэрэ. Кульбертинов кинилэри өйүнэн кыайан, барыларын эккирэтэ сылдьан суох оҥортуура. Онон боростуой снайпер буолбакка, уһулуччулаах бэргэн ытааччы буоларын көрдөрбүтэ. Курскай тоҕой кырыктаах кыргыһыытыгар элбэх өстөөҕү самнарбыта. Кини сэрии кэмигэр элбэх снайпердары үөрэтэн, иитэн-такайан таһаартаабыта.
Хаартыска Кульбертиновтар архыыптарыттан.
-
0
-
0
-
0
-
0
-
0
-
0
