Өлүөхүмэ улууһуттан Ил Түмэн дьокутаата, «Сахатранснефтегазсбыт» генеральнай дириэктэрин солбуйааччы Николай Иванович Кульбертинов итиннэ даҕатан биир түбэлтэни санаан кэллэ. Өлүөхүмэҕэ Токоҕо бэһис кылааска үөрэнэ сылдьан ансаамбыл оҕолорун кытта Дьокуускайга сүлүөккэ кэлэ сылдьыбыттара. Оҕолору куорат таһыгар пионердар лааҕырдарыгар олохтообуттара. Биирдэ мааны таҥастаах солиднай көрүҥнээх дьон кэлэн уолу ыҥыран: «Эн Кульбертинов Коляҕын, оттон аҕаҥ Уйбаан, ол аата Николай Ивановичкын дуо?», — диэн ыйыталаспыттар.
Уол оннук диэбитигэр, саннын таптайбыттар: «Чэ, бардыбыт!”,– диэт тута «Волгаҕа» олордон илдьэ барбыттар. Бука сэрэйдэххэ, Обком дьиэтигэр сырытыннарбыттар, бары сэргээн оҕону кытта илии тутуспуттар, кэһии биэрэн, лааҕырыгар киэһэ төттөрү аҕалан биэрбиттэр. Снайпер уола диэн маанылаан ыыппыттар.
Николай Иванович Чурапчыга Дмитрий Коркин аатынан успуорт оскуолатын бүтэрбитэ, тустуунан дьарыктаммыта, кэлиҥҥи кэмҥэ полиция Дьокуускай куораттааҕы управлениетын салайан олорбута. «Маннык күүстээх араспаанньаны илдьэ сылдьан эппиэтинэһиҥ күүһүрэр, улуу снайпер аатын хайдах түһэн биэриэххиний? Биһиги, өлүөхүмэлэр, кининэн киэн туттабын, снайпер сыдьааннара, ытык киһибит, норуот дьоруойун албан аатын үйэтитэргэ дьулуһабыт», – диир кини.
Аатырбыт снайпер Иван Кульбертинов табалаах турар пааматынньыга Дьокуускай куоракка Кыайыы пааркатыгар оҥоһуллубута, дойдутугар Өлүөхүмэҕэ эмиэ баар. Оттон ДСК оройуонугар объездной суолга Птицефабрикаҕа диэри уулуссаҕа кини аатын иҥэрбиттэрэ.
Кыайыы күнүгэр хас сыл аайы улуу снайпер табатын кытта турар пааматынньыгар сүгүрүйэн, махтанан сибэкки дьөрбөтүн уураллар, быйыл скульптор ытын оҥорон, биир дойдулаахтара мустан, түөрт атахтаах доҕорун туруоруохтаахтар, суругун-бичигин суруйуохтаахтар.
Эбэҥки чулуу уола, байанайдаах булчут, улуу снайпер 76 сааһыгар диэри олорбута, төрөөбүтэ 100 сылын номнуо ааста эрээри, күн бүгүҥҥэ диэри дьоруой үрдүк аата иҥэриллэ илик. Аймахтара, чугас дьоно Иван Николаевич Кульбертинов Сэбиэскэй Сойуус дьоруойун ылбатаҕыттан уоскуйбаттарын, салгыы үлэлэһэллэрин биллэрдилэр.
Кини үрдүк ааты ылбатаҕын да иһин, Манчаары Баһылай курдук уос номоҕор сылдьар норуот дьоруойа, киэн туттар киһитэ. Дьоно этэллэринэн, буусканан ытыыга снайпер Гаврил Протодьяконов уонна саанан ытыыга снайпер Иван Кульбертинов иккиэн аймахтыылар эбит.
Аар саарга аатырбыт бэргэн ытааччы оҕолорун туһунан эттэххэ, уола түөрт, кыыһа үс оҕолоох, снайпер оҕолоро-сиэннэрэ бары Дьокуускай куоракка бааллар. Сатабыллаах снайпер бэргэн ытыытын, тулуурун-дьулуурун, туохтан да тостубат кытаанах майгытын оҕолоро-сиэннэрэ салгыыллар, чуолаан Степанида Артахинова бэйэтин холобурунан ону чаҕылхайдык туоһулуур.
Снайпер Кульбертинов сиэнэ Степанида Артахинова, биллэр ох саанан ытааччы, 2012 с. Паралимпийскай оонньуу боруонса призера, Арассыыйа успуордун үтүөлээх маастара, аан дойду кылаастаах успуорт маастара. Онон ырааҕы-чугаһы эндэппэккэ көрөр сытыы харахтаах бэргэн ытыы, сыалы табыы удьуордаан бэриллэр эбит.
Хаартыска Спорт Якутии, Кульбертиновтар архыыптарыттан, пааматынньыгы ааптар хаартыскаҕа түһэриитэ.
-
0
-
0
-
0
-
0
-
0
-
0
