Уһук Илин эрэгийиэннэрин сокуону оҥорор судаарыстыбаннай былааһын бэрэстэбиитэллэрэ федеральнай былааска кыттыгас этиилэрин көрдүлэр. Биир сүрүн боппуруоһунан Уһук Илиҥҥэ электроэниэргийэ тарыыптарын тэҥнээһин мэхэньиисимин уһаттарыы туһунан РФ Бырабыыталыстыбатыгар туһуламмыт Ыҥырыы суругу ылыныы буолла.
Ил Түмэн бэрэссэдээтэлэ Алексей Еремеев, Уһук Хоту тыйыс усулуобуйатыгар электроэниэргийэ ырыынактааҕы тарыыба олус үрдүгүнэн бу боппуруоһу федеральнай былаас уорганнарыгар туруорсуу наадалаах диэн бэлиэтиир. “Биһиги өрөспүүбүлүкэбитигэр тарыып боппуруоһа сүрүн суолталаах. 2028 сыллаахха Уһук Илин эрэгийиэннэрэ экэнэмиичэскэй өртүнэн сөптөөх тарыыпка көһүөхтээхтэр, оччотугар тарыыптар араастаһыыларын сабар субсидиялааһын мэхэньиисимэ тохтуохтаах. Эрэгийиэннэр бүддьүөттэрэ итинник уларытыыга бэлэмнэрэ суох. Ол иһин бу РФ Бырабыыталыстыбатыгар субсидиялааһын мэхэньиисимин уһатарга анал кэлим комплекснай быһаарыыны оҥорорго Ыҥырыы ылынныбыт”, - диэтэ кини бу боппуруоһу көрүү түмүгүнэн.
Ону таһынан, Уһук Илин парламентарийдара Уопсай мунньахха дьүүллэһэн, үөрэтэн баран Госдуума Миграционнай бэлиитикэ боппуруостарыгар Хамыыһыйатыгар этии ылыннылар. Алексей Еремеев миграционнай бэлиитикэҕэ сокуонунан сүрүннэнэр балаансы буларга этиилээх. Ону таһынан, экэниэмикэ интэриэстэрин уонна уопсастыбаҕа социальнай туругу учуоттуур наада. Холобура, Уһук Илин эрэгийиэннэригэр нэһилиэнньэ аҕыйаҕынан үлэһит тиийбэтин, хайа хостуур бырамыысыланнаһа күүскэ сайдарын уонна үлэһит миграаннар арассыыйа уопсастыбатыгар адаптацияланалларын бииргэ тутан көрөр сокуону дьүүллэһэргэ ыҥырар. Уопсай мунньахха 11 боппуруос көрүлүннэ, 7 эрэгийиэн бэрэстэбиитэллэрэ дакылаат оҥордулар. РФ судаарыстыбаннай былааһын уорганнарыгар киирбит этиилэр уонна ыҥырыылар бу мунньахха бигэргэнэн, салгыы Москубаҕа ыытарга сорудахтанна. Бу парламент Ассоциациятыгар 11 эрэгийиэн бэрэстэбиитэллээх сокуону оҥорор уорганнара киирэрэллэрин санатыахха сөп.
Хаартыскалар Ил Түмэн пресс-сулууспатыттан
-
0
-
0
-
0
-
0
-
0
-
0
