«1994-2003 сылларга Хатас орто оскуолатыгар физругунан үлэлээбитим. Сүрүн үлэм таһынан, эдэр ыччаты мас тардыһыытыгар дьарыктыыр этим. Ол саҕана мас тардыһыыта саҥа сүүрээн быһыытынан киирэн, балысхан сайдыы бастакы хардыылара этэ.
Дьокуускайга оҕолорго өрөспүүбүлүкэ чемпионата буолбута. Онно хатастар ситиһиилээхтик кыттыбыппыт, Женя Пермяков бастаабыта, Сеня Ногнорутов иккис миэстэҕэ тиксибитэ, онтон абсолютнай чөмпүйүөн буолбута.
Мас тардыһыытын чемпионата тиһигин быспакка ыытылларыгар Хатас орто оскуолата уонна олохтоох дьаһалта кэлэктиибэ күүс-көмө буолбуттара. Биирдиилээн энтузиастартан Руслан Кондратьевы уонна Михаил Мордовскойу ааттыахпын баҕарабын.
2003 с. Хатаска 7 №-дээх спортивнай оскуола аһыллыбыта. Биир бастакынан мас тардыһыытын секцията үлэтин саҕалаан, күн бүгүнүгэр диэри үлэлии турар. Уопсайа отучча сыл кэриҥэ нэһилиэкпитигэр мас тардыһыыта сайдарын туһугар үлэлээн-хамсаан кэллибит. Бастакы оҕолорбут номнуо бэтэрээн буоллулар. Успуорт араас көрүҥэр тириэнньэринэн үлэлииллэр, учууталлыыллар.
Анатолий Михайлович Баишев спортивнай оскуолаҕа 2004 с. үлэлии кэлбитэ. Күн бүгүнүгэр диэри илиитин араарбакка таһаарыылаахтык, туппут тэтимин ыһыктыбакка үлэлиир. Дьарыктаабыт оҕолоро өрөспүүбүлүкэҕэ, Уһук Илин, Арассыыйаҕа тиийэ чөмпүйүөн, призер үрдүк аатын ыллылар. Иитэн-үөрэтэн таһаарбыт иитиллээччитэ Григорий Евсеев эмиэ биһиэхэ тириэнньэринэн үлэлиир.
Мас тардыһыытыгар дьарыктаабыт оҕолорбунан киэн туттабын, саамай сүрүнэ олоххо миэстэлэрин буллулар, үлэлээхтэр-хамнастаахтар, дьиэлээхтэр-уоттаахтар, дьиэ-кэргэннээхтэр. Билигин биһиги үлэбитигэр төһүү күүс буолар дьонум эмиэ кинилэр, үбүнэн-харчынан көмөлөһөллөр, тэрээһиннэрбит көҕүлээччилэрэ, өйөөччүлэрэ-өйдөөччүлэрэ буолаллар», — диир Евгений Гоголев.
-
2
-
0
-
0
-
0
-
0
-
0
