Оттон Дьокуускай бириэмэтинэн бөөлүүн бастакы алта ыйааһыҥҥа мэтээл иһин тустуулар буоллулар. Саха сирин хамаандатыттан Лев Павлов (57 кг) – Тунджай Вердиеви (Воронеж) 8:3 ахсаанынан хотон боруонса мэтээли ылары ситистэ.

Күрэхтэһиигэ биһиги хамаандабыт кыттыытыгар түмүк таһаарар эрдэ соҕус буолуо эрээри, кимнээҕэр эрэ ордук кэтэспит бөҕөспүт – Лев Павлов үчүгэйдик туһунна диэххэ сөп. Кини финал чиэппэригэр олохтоохтор эрэллэрэ Оздамировы кытта киирсиитигэр сыыһа судьуйалааһын оҥоһуллан, хотторуулааҕынан ааҕыллыбыта. Атын утарсааччыларын Лев эрэллээхтик кыайталаата. Кимиилээх тустууну көрдөрдө. Онон уолбутугар эрэлбит сүппэт.

Бөөлүүҥҥү тустууларга 65 киилэҕэ кыттыбыт Василий Григорьев саха дьонун үөртэ. Кини бастакы эргииргэ Архиевка (Чечня) хотторон баран, утуу-субуу үс дагестанеһы: Магомедовы, Умаровы 11:0, Шамхаловы 13:0 ахсаанынан хотон, пьедестал үһүс үктэлигэр таҕыста. Онон бастакы финаллар түмүктэринэн Лев Павлов уонна Василий Григорьев – боруонса мэтээллэннилэр.

Бастакы финаллар түмүктэрэ:

57 кг: 1. Магомед-Салях Оздамиров (Чечня), 2. Магомед Сайпудинов (Дагестан), 3. Лев Павлов (Саха сирэ), Юнус Явбатиров (Дагестан).

65 кг: 1. Эльдар Ахмадудинов (Дагестан), 2. Адам Архиев (Чечня), 3. Василий Григорьев (Саха сирэ), Батраз Бароев (Санкт-Петербург).

70 кг: 1. Магомед-Эми Эльтемиров (Чечня), 2. Рустам Долаев (Карачаево-Черкессия), 3. Ибрагимгаджи Магомедов, Адам Гаджимагомедов (иккиэн Дагестан).

74 кг: 1. Магомед Байтукаев (Чечня), 2. Тамир Ешинимаев (Бурятия), 3. Инал Чельдиев (Москва), Гаджимурад Гаджиев (Дагестан).

79 кг: 1. Маламагомед Гамзатов, 2. Абдурахман Абдусаламов, 3. Калсын Абакаров (уьуен Дагестан), Георгий Абаев (Хотугу Осетия).

97 кг: 1. Мустафагаджи Малачдибиров, 2. Магомедгаджи Магомедов (иккиэн Дагестан), 3. Сослан Джагаев (Москва), Камалутдин Баталиев (Дагестан).

Бүгүҥҥү финаллар:

61 кг Усман Индирбаев (Чечня) — Виктор Яковлев (Саха сирэ)

86 кг Арсен Балаян (Калининград) — Абдулхамид Нурмагомедов (Дагестан)

92 кг Гамзат Гасанов (Дагестан) — Арслан Багаев (Хотугу Осетия)

125 кг Хабиб Давудгаджиев (Дагестан) — Андрей Бестаев (Москва).

Бүгүн Дьокуускай бириэмэтинэн 17:00 чаастан санааны уоскутар бөлөх тустуулара, оттон киэһэ 19:00 чаастан быһаарыылаах хапсыһыылар буолуохтара.

PS: Күрэхтэһии ыйааһыннарынан сеткаларын, кэккэ видеолары, суһал сонуннары «Дьулурҕан» телеграмҥа каналыгар — t.me/dzulurgan көрүөххүтүн сөп.

Петр ПАВЛОВ.