Бу туһунан Өрөспүүбүлүкэтээҕи сүүмэрдэммит хамаандалары успуорка бэлэмниир кииҥҥэ иһитиннэрдилэр. Ол курдук, Соҕуруу Кэриэйэ хамаандатын састаабыгар Ким Инсоб киирсиэҕэ. Аан дойду тустууга холбоһуктаах киинин иһитиннэриитинэн, көҥүл тустууга греко-римскэй тустуу көрүҥүттэн көспүт. 2018 сыллаахха 82 киилэҕэ диэри ыйааһыҥҥа Инсоб юниордар ортолоругар Азия первенствотын боруонса призерунан буолбута. Коркин турнирыгар кини 79 киилэҕэ диэри ыйааһыҥҥа көбүөргэ тахсыаҕа. Кинини кытта турнирга Ю Жунёнг кэлэрэ күүтүллэр.
САССР, РСФСР уонна ССРС биллиилээх тириэньэрин Дмитрий Коркин аатынан норуоттар икки ардыларынааҕы турнир Дьокуускайга «Триумф» успуорт уораҕайыгар сэтинньи 15-16 күннэригэр ыытыллыаҕа.
Санаттахха, бу иннинэ турнирга Беларусь, Куба, Япония, Азербайджан уонна Монголия хамаандалара кытталларын биллэрбиттэрэ. Күрэхтэһиигэ 10-тан тахса дойду тустууктара кэлэллэрэ күүтүллэр. Ону кытта элбэх күрэсчиттээх Бүрээтийэ хамаандата кыттыаҕа.
ххх
Дмитрий Коркин кэриэһигэр аналлаах норуоттар икки ардыларынааҕы күрэхтэһиигэ Японияттан тустууктар кэлиэхтэрэ. Япония бэрэстэбиитэллэрэ хас да сыл бу турнирга кыттыбатахтара. Бу туһунан Өрөспүүбүлүкэтээҕи сүүмэрдиир хамаандалары успуорка бэлэмнээһин киинигэр иһитиннэрдилэр.
Хамаанданы тириэньэр быһыытынан аан дойду чөмпүйүөнэ Юки Такахаси салайар. Аатырбыт тустуук эдэр, ол гынан кэскиллээх састаабы бэлэмниир. Дьоппуоннар кылгас кэм иһигэр аан дойду тустуутун лидердэрин бэлэмниэхтэрин биирдэ эрэ дакаастаабыттара. Онон, сэтинньи 15-16 күннэригэр «Триумф» успуорт уораҕайыгар Коркин турнирын мэтээллэрин иһин кэскиллээх сулустар киирсиэхтэрин сөп.
Япония хамаандатын лидерэ – эр дьоҥҥо Азия чөмпүйүөнэ Такара Суда буолар. Кинини кытта аан дойду бастыыр иһин күрэхтэһиилэрин мэтээллээхтэрэ кэлиэхтэрэ. Саха АССР, РСФСР уонна СССР үтүөлээх тириэньэрэ Дмитрий Коркин кэриэһигэр аналлаах норуоттар икки ардыларынааҕы күрэхтэһии сэтинньи 15-16 күннэригэр «Триумф» успуорт комплексыгар ыытыллыаҕа.
Япония хамаандатын састааба:
- Такара Суда — эр дьоҥҥо Азия чөмпүйүөнэ, Венгрияҕа норуоттар икки ардыларынааҕы турнир кыайыылааҕа (61 кг диэри);
- Рейджи Учида — ыччаттарга аан дойду бастыыр иһин күрэхтэһиитин үрүҥ көмүс призера (65 кг диэри);
- Андо Шинго — ыччаттарга аан дойду бастыыр иһин күрэхтэһиитин боруонса призера (74 кг диэри);
- Йонаширо Итсуки — уолаттарга аан дойду бастыыр иһин күрэхтэһиитин боруонса призера (60 кг диэри);
- Таиго Ожино — уолаттарга аан дойду бастыыр иһин күрэхтэһиитин боруонса призера (60 кг диэри);
- Даито Кацуми — ыччаттарга Азия бастыыр иһин күрэхтэһиитин кыттыылааҕа (65 кг диэри);
- Татсужи Ямага.
-
3
-
0
-
0
-
0
-
0
-
0
