Бу күрэхтэһии, 2026 сыл саҥатыгар буолар Иван Ярыгин турнирыгар сүүмэрдиир сыаллаах буолан – эппиэттээх күрэхтэһии. Ол курдук, бастаабыттар Ярыгин турнирыгар кыттар кыаҕы ылаллар.

Билиҥҥи туругунан, бу сылга буолан ааспыт Ярыгин турнирын, Россия чемпионатын, Коркин күрэхтэһиитин, Россия Кубогын түмүктэринэн, РФ Спортивнай тустууга федерациятын быһаарыытынан, биһигиттэн – Лев Павлов (57 кг), Александр Авелов (61 кг), Константин Капрынов, Станислав Свинобоев (70 кг), Олег Фомин (74 кг), Ньургун Сергин (92 кг), Никита Софронов (125 кг) тустар кыахтаахтар.

Иннинээҕи суруйууларбар эппитим курдук, саха тустуутун иннигэр Иван Ярыгин турнира уонна Россия чемпионата – саамай эппиэттээх күрэхтэһиилэр. Бу түһүлгэлэр түмүктэринэн дойду сүүмэрдэммит хамаандалара бастаан Европа, оттон аан дойду чемпионаттарыгар талыллаллар. Атын күрэхтэһиилэр бары чуо бу түһүлгэлэргэ бэлэмнэнии, сүүмэрдээһин эрэ быһыытынан көрүллэллэр. Онон Ярыгин турнирыгар уонна Россия чемпионатыгар кыттыы – саха тустуутун туругун көрдөрөр, сыана быһыллар күрэхтэһиилэрэ.

Дьэ онон, буолаары турар Д.Г. Миндиашвили турнирыгар, Иван Ярыгин күрэхтэһиитигэр кыттар уонна миэстэлэһэр кыахтаах эрэ бөҕөстөрбүт кыттыахтаахтар дии саныыбын. Холобур, 57 киилэҕэ Федор Постников, Любомир Ашеин, 70 киилэҕэ Айсен Потапов, 125 кг – Никита Хабаров.

Чэ, Саха сирин көҥүл тустууга тренердэрэ уонна тустуу салалтата ону барытын ырыҥалаан толкуйдуу сылдьар буолуохтаахтар. Оттон мин санаам итинник.

Петр ПАВЛОВ.