Барыл быһыытынан, бары ыйааһыннарга сэрэбиэй оҥоһулунна, бөҕөстөр утарсааччылара билиннилэр.

Ол курдук, быйылгы чөмпүйэнээккэ  саха тустууга кыһатын иитиллээччилэриттэн Арыйаан Тютрин 57 киилэҕэ, Владимир Егоров 61 киилэҕэ кытталлар. Бөҕөстөрбүт, бу түһүлгэҕэ анаан улахан сыаллаах-соруктаах анал бэлэмнэниини аастылар. Аны кинилэр иннилэригэр сүрүн сорук – Европа чөмпүйэнээтигэр   ситиһиилээхтик кыттыы буолар.

Көҥүл тустуу чөмпүйэнээтин  бастакы күнүгэр көбүөргэ – 57, 65, 70, 79 уонна 97 кг ыйааһыннаахтар тахсыахтара. Барылга олоҕуран кинилэр биир күн иһинэн финалга кимнээх тахсалларын быһаарсыахтаахтар. Онон, биһигиттэн күрэхтэһиини бастакынан Арыйаан Тютрин саҕалыыр.

Кини тустар ыйааһыныгар көрөргүт курдук барыта 13 бөҕөс баар. Манна, Тустуу аан дойдутааҕы холбоһугун (UWW) балаһыанньатыгар олоҕуран, рейтинг быһыытынан, Муса Мехтихановы (Арассыыйа) уонна Ислам Базаргановы (Азербайджан) бастакы уонна иккис нүөмэрдээх кыттааччы оҥорон, үөһээ уонна аллараа бөлөхтөрү баһылааччыларынан анаабыттар.

Сэрэбиэй быһыытынан, Арыйаан аллараа бөлөххө киирбит. Квалификация диэн ааттанар бастакы эргииргэ кини утарсааччытынан турок Юсуп Демир буолуо. Демир сааһа 24-дэ, быйылгы сылга киирэн баран Я.Догу уонна Д.Колов турнирдарын иккис уонна үһүс миэстэлэри ылбыта. Тютрин — Демир тустуутугар кыайбыт бөҕөс салгыы эргииргэ Ислам Базаргановка тахсыа. Өссө бу бөлөххө грузин Роберти Дингашвили баар. Биир тылынан, кытаанах киирсиилэр буолар чинчилээхтэр…

Хаһан баҕарар буоларыныы, биһиги бэйэбит бөҕөспүтүгэр ыалдьабыт уонна ситиһиини эрэ баҕарабыт!

Оттон Владимир Егоров күрэхтэһиини муус устар 25 күнүттэн саҕалыыр. Чөмүйэнээт хаамыытын биһиги сайтпытыгар – dzulurgan.ru уонна телеграмҥа каналбытыгар — t.me/dzulurgan кэтээн ааҕа, көрө сылдьаргытыгар ыҥырабыт.

Чөмпүйэнээт, Дьокуускай бириэмэтинэн бүгүн 17:30 чаастан саҕаланар.

Петр ПАВЛОВ

Хаартыска "Дьулурҕан" саайтан