Мунньахха Борокуратура, СӨ юстицияҕа судаарыстыбаннай кэмитиэтин бэрэстэбиитэллэрэ кыттан олохтоох дьаһалталар баһылыктарын талыыга федеральнай сокуон нуормаларыгар, бороссудуураларыгар болҕомтону уурарга сүбэлээтилэр.
Ол курдук, сокуон ымпыгын-чымпыгын учуоттаан, дьүүллэһиигэ сүрүннээн көрүлүнүллэр: муниципалитет баһылыгын талыы куонкуруһун туһунан информацияны иһитиннэрии болдьоҕун бэрээдэктээһин; эрэгийиэннээҕи тыл сокуонун тутуһан талыы куонкуруһун икки тылынан ыытыы; талыллыбыт киһини байыаннай сулууспаҕа ыҥырыыттан босхолооһун; аччыгый нэһилиэнньэлээх пууннарга куонкурус хамыыһыйыларыгар анал бырайыактары оҥоруу. Дьүүллэһии кэмигэр Дьокуускай куорат баһылыгын талыыга куораттааҕы уокурук уопсастыбаннай палаатата хандьыдааты киллэрэр быраабын туһунан көннөрүүнү туораттылар.
Ону таһынан мунньахха болҕомтону олохтоох салайыныы уорганнарын боломуочуйаларын чуолкайдааһын ылла. Сокуону Ил Түмэн бастакы ааҕыыга ылыныаҕыттан бу сис кэмитиэккэ аадырыстаан 100 этии уонна 50 көннөрүү киирдэ уонна барыта көрүллэн, сорох чааһа ылылынна эбэтэр учуоттанна диэн сис кэмитиэт бэрэссэдээтэлэ бэлиэтээтэ.
Сокуон ахсынньы 23-24 күннэригэр Ил Түмэн уочараттаах 16-с пленарнай мунньаҕар бүтэһиктээх ааҕыыга киириэҕэ.
Биллэрин курдук, олохтоох салайыныы сокуонун барыла бу иннинэ өрөспүүбүлүкэ уопсастыбатыгар бэрт улахан кэпсэтиини таһаарбыта уонна Судаарыстыбаннай Мунньах сэтинньитээҕи сиэссийэтин көрүүтүгэр киллэриллэн, норуот дьокутааттарын өйөбүллэринэн бастакы ааҕыыга ылыныллыбыта. Салгыы хас да түһүмэҕинэн, өрөспүүбүлүкэ улуустарынан билиһиннэрии бэрт киэҥник ыытыллыбыта, дьокутааттар улуустарга тиийэн мунньахтары тэрийэн дьүүллэһии барбыта. Бүтэһигин ахсынньы 17-18 күннэригэр Саха Өрөспүүбүлүкэтин бэрэстэбиитэллээх уорганнарын дьокутааттарын III сийиэһигэр Саха Сирин бары улуустарыттан, оройуоннарыттан уонна үгүс куораттарыттан, нэһилиэктэриттэн сийиэскэ кытта кэлбит муниципальнай тэрээһиннэр дьокутааттара инникитин бу олус суолталаах сокуонунан салайтаран чопчу үлэлэһиэхтээх, олоххо киллэрэр сүдү эппиэтинэстээх дьон быһыытынан сокуон бары өрүтүн ымпыктаан–чымпыктаан ырыппыттара.
Ил Түмэн пресс-сулууспата
Хаартыскалар Василий Кононов, Ил Түмэн түһэриитэ
-
1
-
0
-
0
-
0
-
0
-
0
