- Өрөспүүбүлүкэ саамай кырдьаҕас мусуойдарыттан биирдэстэрэ П.Х.Староватов аатынан кыраайы үөрэтэр мусуой И.Ф.Захаров аатынан Хомус уонна Албан аат диэн филиаллардаах. Үлэһиттэрбит бары уопуттаах, үрдүк үөрэхтээх исписэлиистэр, - диэн Клара Николаевна кэпсээтэ. - П.Х. Староватов аатынан мусуой 1917 сыллаахха тэриллибитэ, үбүлүөйдээх 100 сылын 2017 сыллаахха үрдүк таһымнаахтык бэлиэтээбиппит. Итиннэ анаан мусуойбут туһунан кинигэ тахсыбыта. Кэлэктииби СӨ култууратын үтүөлээх үлэһитэ Татьяна Николаевна Афанасьева салайар. Аан дойдутааҕы Мусуой күнүгэр аналлаах "Ночь в музее" тэрээһини өрөспүүбүлүкэҕэ бастакынан кэриэтэ 2006 сылтан сыл аайы ыытабыт. Быйыл коронавирус дьаҥыттан сылтаан аны күһүҥҥэ диэри көһөрдүбүт.
- Улуу Кыайыы үбүлүөйдээх 75 сылынан элбэх тэрээһини онлайн ыыппыт буолуохтааххыт. Кэлиҥҥи кэмҥэ дьон сэдэх малы-салы биэрэрэ хайдаҕый?
- Албан аат мусуойа буоларбыт да быһыытынан, Улуу Кыайыы сылыгар үлэбит былаана киэҥ далааһыннаах. Бүлүү улууһа үс Сэбиэскэй Сойуус Дьоруойдаах буолан, кинилэр тустарынан дьоҥҥо-сэргэҕэ кэпсиирбит элбэх. Мусуойга элбэх киһи сылдьааччы этэ, ону билигин коронавирустан сылтаан бары онлайн көрөллөр-истэллэр. Дьон-сэргэ араас былыргы тэрили, малы-салы экспонат быһыытынан өрүү аҕала турар. Кинилэр аҕала туралларын тухары мусуой баар буоллаҕа. Бүгүн аан дойдутааҕы мусуой күнүгэр онлайн-экскурсиялары, араас ыйытыылардаах викторинаны уонна "Реликсия моей семьи" диэн хаартысканан куонкурус тэрийэ сылдьабыт.
Бүгүн биһиэхэ икки бүк үөрүүлээх күн буолла. Аан дойдутааҕы Мусуой күнүн сэргэ, Бүлүү куорат ытык кырдьаҕаһа, 94-с хаарын уулларбыт Анна Титовна Саввинова аҕата Тит Саввич урут хаһан эрэ биэрбит адьас былыргы иистэнэр массыынатын экспонат быһыытынан бэлэхтээтэ. Түгэнинэн туһанан, Анна Титовнаҕа кэлэктиип аатыттан дириҥ махталбын тиэрдэбин. Күндү киһибит этэҥҥэ сырыт, аны алта сылынан 100 сааскын этэҥҥэ үбүлүөйдүүргэр баҕарабыт. Түгэнинэн туһанан, П.Х.Староватов аатынан кыраайы үөрэтэр мусуой кэлэктиибин аатыттан өрөспүүбүлүкэбит бары мусуойдарын үлэһиттэрин аан дойдутааҕы Мусуой күнүнэн итиитик-истиҥник эҕэрдэлиибит!
-
0
-
0
-
0
-
0
-
0
-
0
