Омуннурбакка да эрэ орун оннугар буолан оннубун буллум ээ диирдии күөл уута уоскулаҥҥа, уу нуһараҥҥа сууланар. Хонууларга, сыһыыларга тиэтэйэ- саарайа чэчиктэр чэмэлиһэ тыллаллар, кустук өҥүн суһумун түһэрэллэр. Алаас далбар хотуна аар хатыҥ мэник- тэник хахыйахтарын сааскы халыан тыал эриириттэн- мускууруттан хаххалаан хоннохторун анныгар укталлар, хара тыа хамсаабат харабыла, аар тайҕа аарыма көмүскэлэ тэҥкэ тиит көрүҥэр холооно суох нарын, ньаассын түүлүү сымнаҕас мутукчатын дыргыл сытынан тунуйда, кэлбити- барбыты имэрийдэ- томоруйда. Бэс чагда биһирэмнээх оҕолоро бэрдьигэстэр бэркэ диэн сэргэхсийдилэр, сэгэлдьиһэ түстүлэр.
Иирэ талах барахсан иирсээн диэни билбэппин, или- эйэни сэргиибин, бииргэ буолуох диирдии ыһыктыбаттыы ыкса ылсан, өҺүллүбэттии күүскэ тутуһан, ыһыллыбаттыы ыкса ылсан ити диэки бөлөхтөстө, бу диэки булуста.Тыынар тыыннаах барыта күн сырдыгын, сыламныыр сылааһын үллэстээри бу диэкиттэн быгыалаата, ол диэкиттэн өҥөҥнөөтө. Айан көтөрө сыаллаах сиригэр тиийэн сымыыт баттыы охсоору уйа туттар түбүгэр түстэ.
Көмүс күөмэй күөрэгэй дьырылатар- дьурулатар ырыатын тэтимигэр киллэрдэ. Эргий даҕаны эҕэрдэ, хайыс даҕаны хайҕал диэбиттии эргиччи эйэҕэс эйгэ иилии кууһар эриэккэс кэрэ кэмэ Сайын! Тула өттүттэн тыллыы- тиллии, тыыллан-хабыллан туруу, күүс- уох, кыах киириитин туллаҥнаабат тулааһына- сайын! Санаабыппыт сатанар, ылсыбыппыт ыпсар, туппуппут тупсар кэмэ сайын!
Хаартыска эрэдээксийэ архыыбыттан.
-
0
-
0
-
0
-
0
-
0
-
0
