Бэҕэһээ РФ айылҕа ресурсаларыгар уонна экологияҕа миниистирэ Дмитрий Кобылкин коронавирус дьаҥынан сибээстээн быйылгы сааскы булду көҥүллүүрү-көҥүллээбэти быһаарар боломуочуйаны эрэгийиэннэр салалталарыгар сүктэрдэ. «РФ бырабыыталыстыбата хааччахтанан олоруу эрэсиимин киллэрбитинэн сааскы булду көҥүллээһин боппуруоһун эрэгийиэннэргэ сүктэрэргэ этии киллэрэбин» -- диэн федеральнай миниистир быһаарар.
Итини тэҥэ, федеральнай миниистир Андрей Кобылкин анал этиитигэр РФ эрэгийиэннэрин салайааччыларыгар бу ыксаллаах кэмҥэ аччыгый уонна орто биисинэскэ өйөбүл оҥороллоругар булт хаһаайыстыбатын умнубаттарыгар уонна сааскы булт көҥүлэ бобулуннаҕына даҕаны Сибииргэ, Уһук Илин уокурукка баар хотугу аҕыйах ахсааннаах норуоттар, булдунан иитиллэн олорор общиналар бырааптара улаханнык күөмчэлэниэ суохтааҕа ыйыллар.
Санатар буоллахха, РФ айылҕа ресурсаларыгар уонна экологияҕа министиэристибэтэ эрдэтээҥи иһитиннэриитигэр коронавирус инпиэксийэтэ көтөрүнэн тарҕамматын туһунан ыйбыта. Ол да үрдүнэн эрэгийиэннэр бу нэдиэлэттэн саҕалаан итиннэ болҕомтону ууруохтаахтар. Бу туһунан РФ тустаах министиэристибэтин пресс-сулууспата иһитиннэрдэ.
Бу боппуруоһунан Саха сирин бырабыыталыстыбата дьарыктанан эрэр. Бүгүн СӨ бырабыыталыстыбатын иһинэн тэриллибит хамыыһыйа мунньахтаата, мунньаҕы СӨ бырабыыталыстыбатын бэрэссэдээтэлин солбуйааччы Денис Белозеров салайан ыытта. Мунньах түмүгүнэн Саха сиригэр сааскы булт көҥүллэнэрин-көҥүллэммэтин кэлэр нэдиэлэҕэ быһаарарга көһөрдүлэр.
Мунньахха кыттыыны ылбыт СӨ ветеранарияҕа департаменын салайааччытын э.т. Саргылаана Павловаттан ыйыталаспыппытыгар, “Сааскы булду көҥүллүүр эбэтэр көҥүллэммэтин туһунан быһаарыныы кэлэр нэдиэлэҕэ ылыллар буолла. Коронавирус инпиэксийэтэ кыылынан, куһунан тарҕанарын туһунан сөптөөх быһаарыы суох. Бултуу тахсар дьон тарҕатыахтарын сөп. Билиҥҥи туругунан көтөр кириибин эрэ быһаарар (мониторинг) кыахтаахпыт. Сааскы булт сезонун иннинэ ветеранария департаменын исписэлиистэрэ кустары өлөрөн баран, лабораторнай чинчийии (патологическэй) оҥоруохтара», -- диэн кэпсээтэ.
Бу боппуруоска СӨ экологияҕа, айылҕаны туһаныыга уонна ойуур хаһаайыстыбатын миниистирин солбуйааччы Николай Додохов: “Билигин да бириэмэ баар. Онон улуустартан ити боппуруоска этиилэрин көрдөөн бүгүн сурук ыыттыбыт. Кэлэр нэдиэлэҕэ мунньахтаан сөбүлэһэн баран, коронавирус инпиэксийэтэ тарҕаныытын туругуттан көрөн сөптөөх быһаарыныыны ылыахпыт. Манна Борокуратуура, Росприроднадзор, Россельхознадзор управлениеларын, Ветеранария департаменын уонна уопсастыбаннас этиилэрэ хайаан да учуоттаныахтара», -- диэн эбии быһааран биэрдэ.
-
0
-
0
-
0
-
0
-
0
-
0
