Киэҥ киэлилээх Сахабыт сиригэр «Кэнчээри» ырыа-үҥкүү ансамблын туһунан истибэтэх киһи тарбахха баттанар буолуохтаах. Бу ансамбль саха оҕотун талаанын, дьоҕурун аар саарга аатырдыан аатырта. Ол курдук, алаас оҕото фольклортан саҕалаан, аан дойду классиктарын айымньыларын үс манеранан толорор дэгиттэр кыахтааҕын Африкаҕа, Парижка, Турцияҕа тиийэ көрдөрбүтэ.
«Кэнчээри» анмсабль кыттыылаахтара саха оҕолоруттан бастакынан Бүтүн Союзтааҕы араадьыйаҕа уһуллубуттара. Оттон 1979 сыллаахха киин телевидение «Веселые нотки», «Твочество юных» биэриилэригэр вокальнай-хореографическай композицияны толорбуттара.
1983 сыллаахха Останкино кэнсиэртиир саалатыгар сольнай кэнсиэр биэрбиттэрэ. Итилэри саха култууратын уонна искусствотын историятыгар киириэн киирэр түгэннэринэн ааҕабын.
«Мелодия» фирмаҕа грампластинкаҕа иккитэ уһуллубуттара. «Кэнчээри» ансамбль «Эдэр музыкант», «Саха сирин култууратын уонна искусствотын» уонна «Богатство России» энциклопедияларга киллэриллибитэ.
Ансамбль кыттыылаахтара Саха сирин уонна Арассыыйа историятыгар аан бастаан Храм Христа Спасителя литургическай айымньыны сахалыы тылынан толорбуттара. Санкт-Петербург куоракка эмиэ Казанскай Кафедральнай Соборго ансамбль эмиэ литургическай айымньылары толорууга кыттыыны ылбыта.
Василий Парников «Тойон Мүрү» улуустааҕы мелодистар түмсүүлэрин төрүттээччитэ уонна бэрэссэдээтэлэ. Кини — самодеятельнай композитор, 40-тан тахса ырыа ааптара.
Уус-Алдан улууһун гимнин истибит эрэ киһи сэргиир, астынар. Арааһа, өрөспүүбүлүкэ улуустарын гимнэриттэн биир бастыҥнара буолар диэтэхпинэ, омуннааһын буолбата чахчы. Дьэ бу гимн ааптардарыттан биирдэстэринэн эмиэ Василий Степанович буолар. Маны таһынан кини «Азия оҕолоро» норуоттар икки ардыларынааҕы спортивнай оонньуулар, Мүрү нэһилиэгин гимнэрин ааптардара. Үһүс өрөспүүбүлүкэтээҕи Олоҥхо ыһыаҕын гимнин муусукатын эмиэ Василий Парников айбыта.
«Талааннаах киһи, барытыгар талааннаах» диэн мээнэҕэ эппэттэр. Василий Степанович Россия суруналыыстарын Союһун чилиэнэ, 10 кинигэ, 500-тэн тахса ыстатыйа, элбэх брошюра, ырыанньыктар ааптардара. Аны туран, кини чөл олох уҕараабат пропагандиһа, лектора.
-
0
-
0
-
0
-
0
-
0
-
0
