Ити кэнниттэн нөҥүө сылыгар Саха Өрөспүүбүлүкэтин Суруналыыстарын сойууһун бырабылыанньата (бэрэссэдээтэл Галина Бочкарева) Ил Дархацца боппуруоһу салгыы туруорсубута уонна «Саха сирэ» хаһыаты кытта Национальнай бэчээт кунун бэлиэтээн «төгүрүк остуол» ыыппыта. Бу тэрээһиҥҥэ учуонайдар кыттыыны ылбыттара. Кинилэр ерөспүүбүлүкэ уонна улуустар хаһыаттарын тылларын-өстөрүн ырыппыттара.
Салгыы 2019 сыллаахха от ыйыгар сойуус бырабылыанньата аны «Ситим» медиа-бөлөҕү кытта Национальнай бэчээт кунун тэрийбитэ уонна эмиэ «төгүрүк остуолу», сахалыы тылынан суруйар суруналыыстарга анаан «Уһун Дьурантаайы» диэн айар куонкуруһу бэрт тэрээһиннээхтик ыыппыттара. «Төгүрүк остуолга» суруналыыстар социальнай өттүнэн көмүскэллээх буолууларын, сурутуу, хамнас боппуруостара көтөҕүллүбүттэрэ. Тэрээһин түмүгүнэн Саха Өрөспүүбүлүкэтин Суруналыыстарын сойууһун бырабылыанньата Ил Дархан Айсен Николаевка Национальнай бэчээт кунун олохтууру ессее тегул туруорсан, быраабыталыстыба бэрэссэдээтэлигэр Владимир Солодовка уонна Өрөспүүбүлүкэ профсоюзтарын Федерациятын бэрэссэдээтэлэ Николай Дегтяревка суруналыыстар хамнастарын урдэтиини туруорсан анабыл суруктары бэлэмнээн ыыппыта.
Национальнай бэчээт күнэ олохтонно!
Ил Дархан Айсен Николаев Төрөөбүт тыл уонна сурук-бичик күнүгэр Национальнай бэчээт күнүн олохтуур туһунан ыйаахха илии баттаата. Ол курдук, олунньу 13 күнүгэр 1007 нүөмэрдээх ыйааҕынан от ыйын 1 күнүн сахалыы тыллаах Национальнай бэчээт күнүнэн биллэрдэ.Биир идэлээхтэрбитин истиҥник эҕэрдэлиибит!
Туох барыта тэҥнэбилгэ көстөн кэлэр. Атын норуоттар бэчээттэрин историятын көрдөххө, оннооҕор илиинэн суруллубут листовкаларын, хаһыат таһаара сатаан баран, кыайан таһаарбатах түгэннэрин кытта историяларыгар тиһэллэр эбит. Ол курдук, бурят тылынан «Шэнэ байдал» диэн маҥнайгы хаһыат 1921 сыллаахха тахсыбыт. Оттон тувинныы тылынан бастакы хаһыат 1926 сыллаахха эрэ бэчээттэммит.
Калмыкия Президенэ Кирсан Илюмжинов 2002 сыллаахха сэтинньи 15 күнүн өрөспүүбүлүкэтигэр Национальнай бэчээт күнүнэн биллэрбит. 1917 сыллаахха ити күн «Ойратские известия» диэн бастакы хаһыаттара күн сирин көрбүт.
Оттон элбэх ахсааннаах татаар норуотун тылынан «Нур» (Саһарҕа» диэн бастакы хаһыат 1905 сыллаахха балаҕан ыйын 2 күнүгэр тахсыбыт. Башкирияҕа эмиэ татаардыы тылынан «Бакыг» диэн маҥнайгы хаһыаттара 1906 сыллаахха күн сирин көрбүт. Кинилэргэ Национальнай бэчээттэрин куннэрэ бэлиэтэммиттэрэ быданнаабыт. Бу элбэх ахсааннаах нэһилиэнньэлээх бөдөҥ өрөспүүбүлүкэлэр бэчээттэрин историятын кытта биһиэнэ араа-бараатын бэлиэтиибин. Маннык дириҥ историялаах өрөспүүбүлүкэ национальнай бэчээтэ сайдыахтаах, кэскилэ киэҥ буолуохтаах.
Онон олунньу 13 күнэ өрөспүүбүлүкэ Национальнай бэчээтин сайдыытыгар историяҕа хаалар бэлиэ күнүнэн буолла. Ил Дархан Ыйааҕыттан суруналыыстар, бэчээт үлэһиттэрэ эрэ буолбакка, Сахабыт сирин олохтоохторо үгүстэрэ үөрбүттэрэ, санаалара көтөҕүллүбүтэ саарбаҕа суох.
Людмила НОГОВИЦЫНА
-
0
-
0
-
0
-
0
-
0
-
0
