Ытыктабыллаах кэллиэгэбитин, биллиилээх суруналыыһы, салайааччыбытын бу бэлиэ күнүнэн эҕэрдэлиибит!
Биһиги ытыктыыр кэллиэгэбит Саха бэчээтин саргыта салалларын туһугар өр кэмҥэ дьаныардаахтык үлэлээн, былааһы уонна нэһилиэнньэни ситимниир, сонуннары киэҥ эйгэҕэ тарҕатар сириэстибэлэр сайдыыларыгар улахан кылаатын киллэрэр. Кини биһиги сыахпыт бастыҥ холобур буолар, инники күөҥҥэ сылдьар биир төһүү үлэһит киһитэ.
Галина Алексеевна суруналыыстыкаҕа уонна бэчээт эйгэтигэр бастакы хардыыларын Уус Алдан, Мэҥэ Хаҥалас улууһун хаһыаттарыгар саҕалаан, өрөспүүбүлүкэҕэ ытыктанар, илин эҥэр кырдьаҕас эрэдээксийэлэрин сайдыыларыгар бэрт таһаарыылаахтык үлэлэлээбитэ. Сэргэх идиэйэлээх, сонун көрүүлээх, талба талааннаах, ураты буочардаах суруналыыһы бэчээт эйгэтигэр салайааччынан анаабыттара. Ол курдук, Саха Сирин бастакы Бэрэсидьиэнэ Михаил Николаев ыйаҕынан “Вся республика. Өрөспүүбүлүкэ бүттүүнэ” хаһыаттар кылаабынай эрэдээктэрдэринэн анаммыта. Салгыы “Дьулурҕан”, “Ваше право” хаһыаттары, “Сахабэчээт” судаарыстыбаннай тэрилтэни салайан тэрийбитэ, атахтарыгар туруорбута.
Кини үлүскэннээх үлэтинэн-хамнаһынан, киэҥ билиитинэн-көрүүтүнэн салайар кэлэктииптэрин, биир идэлээхтэрин СӨ Суруналыыстарын сойууһугар түмпүтүн, араас интэриэһинэй улахан бырайыактары, бэстибээллэри, тэрээһиннэри, күрэхтэри, омук сирдэринэн пресс-туурдары тэрийбитин, буойун-суруналыыстарга анаммыт мемориальнай искибиэри туттарбытын, суруналыыстыка түмэлин саҕалаабытын киэн тутта, махтана бэлиэтиибит.
Галина Алексеевна 2019 сыллаахтан “Ил Түмэн” издательскай дьиэ шеф-эрэдээктэринэн ананан, билигин биһиги кэлэктииппитин түмэн үлэлэтэр, сатабыллаахтык салайар. Биһиэхэ суруналыыстыка, бэчээт мындыр, сыралаах үлэтин кистэлэҥнэрин арыйан, сороҕор кытаанахтык ирдээн, ыйан-такайан үөрэтэрин билинэбит уонна ылынабыт.
Галина Алексеевна олоҕун 44 сылын Саха Сирин суруналыыстыкатыгар, бэчээтигэр анаабытын уонна бу уустук эйгэ туруктаах буоларыгар, сайдарыгар киллэрбит улахан кылаатын билинэн тураммыт, ыллыктаах санаатын, айымньылаах үлэтин үрдүктүк сыаналыыбыт, дириҥник ытыктыыбыт.
Галина Алексеевнаҕа эдэрдии эрчимнээх, чэгиэн-чэбдик бэйэлээх, үөрүү-көтүү үктэллээх, дьол-соргу тосхоллоох, толкуйдаабыккын тобула, санаабыккын саргылыы сырыт диэн алгыс бастыҥын аныыбыт, эҕэрдэ эйэҕэһин этэбит!
«Ил Түмэн» издательскай дьиэ кэлэктиибэ
-
5
-
0
-
0
-
0
-
0
-
0
