Бу күн Дьокуускай куорат Петровскай уулуссаҕа, 17 №-дээх оскуола иннигэр өрөспүүбүлүкэ биир сүдү судаарыстыбаннай, бэлитиичэскэй диэйэтэлэ, Аҕа дойду Улуу сэриитин ыар кэмнэригэр Саха АССР салайбыт Илья Егорович Винокуров пааматынньыгар сибэккини ууруу ыытылынна. Тэрээһиҥҥэ Ил Түмэн Тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов, СӨ үп миниистирин бастакы солбуйааччы Елена Хиль, Нам улууһун баһылыгын социальнай боппуруостарга солбуйааччы Юрий Дьяконов кыттан тыл эттилэр, ону кытта Дьокуускай куорат Дууматын дьокутааттара уонна Нам улууһун бэрэстэбиитэллэрэ, Дьокуускай куорат 17№-дээх оскуолатын үөрэнээччилэрэ, куорат олохтоохторо кытыннылар.
– Бу бэлиэ күҥҥэ биһиги Саха Өрөспүүбүлүкэтин судаарыстыбаннаһын олохтоспут чулуу дьоммутун ахтан-санаан, кинилэр сырдык ааттарыгар сүгүрүйэн ааһар ытык иэстээхпит.
Илья Егорович Винокуров Аҕа дойду Улуу сэриитин ыар кэмнэригэр Саха АССР Народнай хамыһаардарын сэбиэтин бэрэссэдээтэлин солбуйааччынан, бэрэссэдээтэлинэн, онтон салгыы Саха АССР баартыйа обкуомун бастакы сэкиритээринэн үлэлээбитэ. Сэрии саҕанааҕы сут сылларга дойду үрдүкү салалтатыгар туруорсан, нэһилиэнньэни араҥаччылыыр дьаһаллары тэрийбитэ: холкуостар иэстэрин сотторбута, аһылык саппаас пуондатын тэрийтэрэн, бурдук лимиитин улаатыннаран, сүөһү маассабай төрүөҕүн, сааскы ыһыы, сайыҥҥы оттооһун, күһүҥҥү хомуур курдук дьылы быһаарар сүрүн үлэлэр кэмнэригэр холкуостарга «итии» аһылыгы тэрийтэрэн, саха норуотун хоргуйууттан өрүһүйбүтэ, 1942 сыллаахха хоту көһөрүллүбүт Чурапчы холкуостара 1944 сыллаахха дойдуларыгар төннөллөрүн ситиспитэ. Илья Егорович сырдык аатын, норуотун туһугар олоҕун Саха Сирин олохтоохторо умнубаттар уонна салгыы эдэр ыччакка тириэрдэллэр, - диэн тыл этээччилэр бэлиэтээтилэр.
-
0
-
0
-
0
-
0
-
0
-
0
