Быйылгы Норуот сомоҕолоһуутун күнэ хамсык кэмигэр сөп түбэстэ. Онон, Арассыыйа үрдүнэн үгүс тэрээһин “онлайн” көрүҥүнэн барара былааннанар. Ол гынан баран, РФ Култууратын миниистирин солбуйааччы Максим Ксензов: “Эпидемиологическай балаһыанньанан көҥүллэнэр эрэгийиэннэргэ бары харыстанар мирэлэри тутуһан, үгэскэ кубулуйбут көрүҥүнэн бырааһынньыктыыллара көҥүллэнэр”, – диэтэ. Инньэ гынан Арассыыйа сорох куораттарын олохтоохторо уулуссаҕа тахсан бэлиэ күнү көрсүөхтэрэ.
Бүгүҥҥү күн сүрүн тэрээһиннэрэ “Культура.РФ” босхо порталга буолаллара күүтүллэр. Ону таһынан, бэҕэһээттэн “Ускуустуба түүнэ” (“Ночь искусств”) саҕаланна. Ити аахсыйа чэрчитинэн биэс аҥаар тыһыынча онлайн-тэрээһин былааннанар. Манна Арассыыйа Федерациятын эрэгийиэннэрэ бары кытталлар. Холобур, Камчатка драматын тыйаатыра, Саратовтааҕы филармония, Саха Өрөспүүбүлүкэтин Национальнай бибэлитиэкэтэ, Пензатааҕы хартыына галереята, Симферополь художественнай мусуойа, Владимирскай драматическай тыйаатыр, о.д.а.
Арассыыйа олохтоохторо өрөбүл күн дьиэҕэ олорон аһара чуҥкуйбаттарын курдук, аныгы технологиялары туһанан эмиэ араас тэрээһиннэр былааннаннылар. Ол курдук, “Коломенскай” Мусуой, Щусева аатынан Архитектура мусуойугар TikTok экскурсиялар буолуохтара. “#КультурныйTikTok” бырайыак иһинэн Бахрушина тыйаатырын мусуойугар экскурсия ыытыаллыаҕа. “Клипы ВКонтакте” платформаҕа саҥа бырайыак саҕаланыаҕа. Онно биллэр блогердар күнүн аайы Арассыыйа мусуойдарын эспэнээттэрин туһунан сэһэргиэхтэрэ. Бырайыак сыл бүтүөр диэри барыаҕа. Арассыыйа национальнай бибэлитиэкэтэ быһа холбонуу көрүҥүнэн Чайковскай уонна Метнер композитордар үбүлүөйдэригэр аналлаах тэрээһиннэри ыытыаҕа. Арассыыйатааҕы оҕо бибэлитиэкэтэ Арассыыйа омуктарын тылларын тустарынан анал биэриини көрдөрүөҕэ. Оттон хараҕа суохтар Арассыыйа судаарыстыбаннай бибэлитиэкэтигэр эрийэн тиийэн, К. Минин уонна Д. Пожарскай хорсун быһыыларыгар аналлаах кинигэ быыстапкатын туһунан истиэхтэрэ.
-
0
-
0
-
0
-
0
-
0
-
0
