Мария, 56 саастаах, Дьокуускай к. олохтооҕо:
-- Сэтинньи сэттистиир күүрээннээх күнүнэн эҕэрдэ! Сэбиэскэй кэмҥэ ньиргийэн-ньаргыйан параад, кэнсиэр, бырааһынньык бөҕө буолара! Билигин санаатахха, үчүгэй да кэмнэр ааспыттар...
Надежда, Хатас олохтооҕо:
-- Өктөөп бырааһынньыгар үтүө өйдөбүл элбэх буо. Дойдубар киин уулуссаҕа олорор буолан, сэлэлээн хаамсан иһэр дьоҥҥо кырачаан былаахпытын туппутунан сүүрэн тахсан кыттыһарбыт. Ол саҕана Сунтаарга "Партизанскай" диэн ааттаах уулуссабыт дьону күүттэххэ, уһун, өр күүтүүлээх курдук буолара. Барыта уот кыһыл өҥ оҕочоос дьон сүргэтин көтөҕөрө. Оттон убайдарбыт киэһэ хараҥаҕа хаамса тахсаары бааҥкаҕа уот уматталларын өйдүүбүн. Кыра дьон түннүгүнэн көрдөхпүтүнэ, уулусса сырдаан олороро, уруй-айхал саҥата дуорааннанан иһиллэрэ.
Өктөөп өрөбүлүүссэйитин күнэ биһиэхэ өссө биир өйдөбүлү хаалларбыт. Аҕабыт барахсан каникуллар саҕана кууруссаларын өлөртүүр этэ. Хомолтолоох соҕус хартыына буолааччы да, күн-дьыл ааһан истэҕин аайы Өктөөп күнүн кытта сибээстиир өйдөбүл буолан иһэр.
Николай, 60 саастаах, Дьокуускай к. олохтооҕо:
-- Өктөөп биэрбит дьолугар тиксибиттэр,үөрэммиттэр,үлэлээбиттэр,сынньаммыттар,эмтэммиттэр, иннибитигэр куруук ыраас, сырдык ыралаах, угуйа тыга сулустаах,кыыһа кыынньар былаахтаах биһиги көлүөнэ буолабыт!Баарбыт тухары махтаныахпыт,тыыннаахпыт тухары саныахпыт,олохпут устата өйдүөхпүт,киэн туттуохпут!
Елена, 56 саастаах, Таатта:
-- Устудьуоннуу сылдьан олус да өрө күүрүүлээхтик бырааһынньыктааччыбыт. Оччолорго бу кэмҥэ параадтаары бэлэмнэнэ сылдьабыт. Орджоникидзе болуоссатыгар тоҥо-тоҥо кэтэһэн турабыт, онтон, дьэ сүүрэбит дьону сырсан. Күлүү-үөрүү бөҕө буолабыт. Онтон киэһэ уопсайбытыгар кэнсиэрт, үҥкүү буолара. Олус да үтүө кэмнэр этэ.
РФКП фракция Саха сиринээҕи салаатын дьокутаата Петр Аммосов:
-- Бу күнү олох суох гымматахтара. 2005 сыллаахха Арассыыйа салалтата Өктөөп өрөбүлүүссүйэтин өрөгөйүн бэлиэтиир күнү Норуоттар сомоҕолоһууларын күнүгэр уларыппыта. Чахчыта да, Өктөөп өрөбөлүүссүйэтэ диэн история хаамыытын уларыппыт, киһи аймах сайдыытыгар сабыдыаллаабыт, инники кэскилин түстээбит улуу кэминэн буолар. Биһиги, коммунистар, оччотооҕу кэм Арассыыйа устуоруйатыгар саамай үтүө кэминэн буолар этэ диэн хаһан баҕарар этэбит. Үлэтэ суох буолааһын кыһалҕата суоҕа, киһи босхо эмтэнэрэ. Билигин Ковид ыарыыта капитализм бу ыарыыны кытта охсуһар кыаҕа суоҕун көрдөрдө. Кытай онуоха холобурунан буолар. Биһиэхэ, мөллүйүөн да нэһилиэнньэтэ суох сиргэ, күнүн аайы 200 киһи ыалдьар. Оттон 1,5 млрд нэһилиэнньэлээх коммунизмы тутар Кытайга 36 киһи ыалдьыбыт биир күн иһигэр. Онон судаарыстыба ханнык тутула күүстээҕин көрөбүт. Бүгүҥҥү бырааһынньыгынан эҕэрдэлиибин өрөспүүбүлүкэ олохтоохторун!
-
0
-
0
-
0
-
0
-
0
-
0
