Дьокуускайга урукку сылларга тохсунньу 19 күнүгэр Күөх Хонууга анаан оҥоһуллубут чардааттаах ойбоҥҥо киһи толору буолара. Быйыл, хамсык дьаҥынан сиэттэрэн, ойбоҥҥо чомполонуу бобуллан турар. Онон, куһаҕан үчүгэйдээҕэр дылы, хааччахтааһын элбэх киһини сыыстарыыттан, ойоҕостотууттан быыһаата бадахтаах. Бөлүүн Дьокуускайга уонна киин улуустарга халлааммыт хаһааҥҥытааҕар даҕаны тымныйда: кыраадыс кэрдииһэ - 54-кэ диэри түстэ. Дьиҥнээх “Кириһиэнньэ тымныыта” диэн дьэ сатыылаата.
Былыр сахалар тохсунньу ыйы бүтэй кэминэн ааҕаллара. Бу ыйга аан-даан тымныы түһэр. Хараҥа бүрүүкүүр. Дьон хараҥа оройугар, дьыл быыһыгар бит-билгэ көбөр диэн итэҕэйэллэр. Ити курдук таҥхаланыы диэн үөскээбит. Таҥха диэн дьылҕаны таайыы, инникини өтө көрүнүү. Саха итэҕэлигэр тохсунньу таҥарата – Таҥха Хаан. Тохсунньу 19 күнүгэр таҥхаланыы бүтэр. Былыргынан оҕус баһын сиир күн.
-
0
-
0
-
0
-
0
-
0
-
0
