В.П.Ларионов Мэҥэ Хаҥалас оройуонун II Тыыллыма нэһилиэгэр Лоомтукаҕа 1938 с. олунньу 10 күнүгэр төрөөбүтэ. Майа орто оскуолатын 1956 с. кыһыл көмүс мэтээлинэн бүтэрэн, Н.Э.Бауман аатынан Москватааҕы үрдүкү тэхиньиичэскэй училищеҕа туттарсан киирбитэ. Үөрэҕин 1962 с. ситиһиилээхтик бүтэрэн, “Массыынаны тутуу технологията, тимири быһар станоктар уонна инструменнар” идэни ылбыта. Үлэтин ССРС НА Сибиирдээҕи салаатын Саха сиринээҕи филиалыгар лаборанынан, онтон Уһук хотугу сиргэ массыына уонна тимир конструкция тымныыны тулуйумтуотун тургутар бөлөх салайааччытынан саҕалаабыта. Кини айылҕа тымныытын туһанан, хотугу тыйыс усулуобуйаҕа массыына уонна тимир конструкция үлэлиир кыахтарын үрдэтиигэ бэртээхэй түмүктэри ылбыта. Эдэр кэскиллээх исписэлиис 1967 с. Е.О.Патон аатынан УССР АН электросыбаарка институтун иһинэн анал сэбиэт мунньаҕар “ССРС хотугулуу-илиҥҥи эҥээрин усулуобуйатыгар сыбаарка холбоһуктарын бытархай алдьаныылара” диэн тиэмэҕэ үлэтин көмүскээн, тиэхиньикэ билимигэр хандьытаат буолбута.
Владимир Петрович 1968 с. үлэлиир филиалыгар сыбаарка салаатын лабораториятын тэрийэн салайбыта. Кини тус кыттыытынан, кыһамньытынан 1970 с. Хотугу сир физика-тэхиньиичэскэй проблемаларын института тэриллибитэ. Ити институт базатыгар салгыы Хотугу сир хайа дьыалатыгар института, Тимир буолбатах матырыйаалларга институт уонна Ньиэп, гаас проблемаларын института арыллыбыттара.
В.Ларионов ыыппыт чинчийиилэрин уонна эксперименнэрин түмүктэрин дойдуга уонна тас дойдуларга улаханнык сэҥээрбиттэрэ. Чинчийиилэрин чөкөтөн, ырытан, 1983 с. дуоктар буолар үлэтин көмүскээбитэ. Онтон 1987 с. профессор аатын иҥэрбиттэрэ. Тэрийбит институтугар 1986 с. дириэктэринэн талыллыбыта уонна олоҕун тиһэх күнүгэр диэри салайбыта. Бөдөҥ учуонай, сахаттан РНА бастакы академига В.П.Ларионов РНА Сибиирдээҕи салаатын Саха сиринээҕи билимин киинин президиумун бэрэссэдээтэлинэн иккитэ талыллан үлэлээбитэ.
Бүгүн, олунньу 10 күнүгэр, академик Владимир Ларионов төрөөбүтэ 83 сылыгар уонна Мэҥэ Хаҥалас оройуона төрүттэммит күнүгэр тоҕооһуннаран, кини биир дойдулаахтара, үөлээннээхтэрэ Дьокуускайга мэҥэ өйдөбүнньүгэр сибэкки дьөрбөтүн уурдулар, ахтан-санаан аастылар. “Дойду ситимэ” диэн Дьокуускай куоракка олохсуйбут биир дойдулаахтар түмсүүлэрин салайааччыта, Ил Түмэн дьокутаата Юрий Баишев, үөлээннээхтэрэ Матвей Мучин, Аркадий Алексеев, Георгий Артемьев, о.д.а. улахан киһи баай ис хоһоонноох олоҕун, үлэтин туһунан истиҥ ахтыылары оҥордулар.
-
1
-
0
-
0
-
0
-
0
-
0
