Уус Алдан оройуонун Тэбиик (билигин Дүпсүн) нэһилиэгэр төрөөбүтэ. 1969 с. СГУ историко-филологическай факультетыгар саха тылын, литературатын салаатын бүтэрбитэ, Дүпсүн орто оскуолатыгар иитэр үлэ завуһунан, кэлин комсомол, баартыйа райкомнарын аппаратыгар үлэлээбитэ. 1973-1987, 1991-2017 сс. барыта 35 сыл "Ленинскэй тэрийээччи", "Мүрү саһарҕата" хаһыат эппиэттиир сэкирэтээринэн, 2018 сылтан отдел редакторынан, билигин корреспондент быһыытынан үлэлээн, эдэрдэргэ бэйэтин сүҥкэн уопутун, билиитин тириэрдэр.
Сүүрбэттэн тахса лирическай хоһоонугар араас мелодистар ырыа айаллар. "Уйгу сирэ - Уус Алдан" , "Олоҥхо ыһыаҕа", "Сүгүрүй, үс саха төрүөҕэ", "Бастыҥ дьонноох Баатаҕай" гимн буолбут хоһооннордоох. СӨ суруналыыстарын Сойууһун олохтообут Шувалов аатынан бириэмийэ иккис хаһаайына.Уус Алдан улууһун, Мүрү уонна Дүпсүн нэһилиэктэрин Бочуоттаах гражданина, Саха Өрөспүүбүлүкэтин култууратын үтүөлээх үлэһитэ, Арассыыйа Суруналыыстарын сойууһун чилиэнэ, СӨ Суруйааччыларын сойууһун чилиэнэ. Суруналыыстыка эйгэтигэр 2015 сыл түмүгүнэн В.В. Никифоров-Күлүмнүүр аатынан СӨ Судаарыстыбаннай бириэмийэ лауреата.
Хоһооннорун маҥнайгы кинигэтэ 1995 с. тахсыбыта. Поэзияны оскуолаҕа үөрэммит сылларыттан сөбүлүүр, тыл сөҕүмэр күүһүгэр сүгүрүйэр.
Ытыктабыллаах Иннокентий Ильич! Эйигин 80 сааскын туолбут үтүө-мааны күҥҥүнэн итиитик-истиҥник эҕэрдэлиибит! Баҕарабыт кытаанах доруобуйаны, бары үтүөнү, кэрэни, инникитин да өссө үгүс сылларга эн олоххор үөрүү-көтүү, дьол-соргу тосхойдун.
- 0
- 0
- 0
- 0
- 0
- 0