Бу ааспыт сыллар усталарыгар Владивостокка ыытыллар Илиҥҥи экэнэмиичэскэй пуорум Арассыыйа Япония, Кытай, Индия уо.д.а. курдук Азия бөдөҥ судаарыстыбаларын кытары кэпсэтии ыытар сүрүн түһүлгэтинэн буолла. Пуорум хабар эйгэтэ сыл ахсын кэҥээн, кыттааччы ахсаана элбээн иһэр. Ол курдук, 2017 сыллаахха 2,5 трлн солкуобай суумалаах араас дуогабар түһэрсиллибит буоллаҕына, 2019 сыллаахха 3,4 трлн солкуобайдаах кэпсэтии барбыта.
Саха Өрөспүүбүлүкэтэ пуорумҥа көхтөөхтүк кыттар, социальнай-экэнэмиичэскэй олоххо улахан суолталаах бырайыактары бастаан манна билиһиннэрэр, тустаах дуогабардары түһэрсэр. IT-паарка, Япония технлогиятынан төгүрүк сыл устата үлэлиир «Саюри» оҕруот комплекстын, Тиксиигэ тыал күүһүнэн үлэлиир электростанцияны тутуу, Арктика улуустарыгар түргэн интэриниэти киллэрии уо.д.а. бырайыактара бу пуорумҥа биһирэнэн баран, салгыы инвестордары кытары үгүс кэпсэтии ыытыллан, олоххо киллэриллибиттэрэ.
Былырыын пандемиянан сибээстээн, пуорум сорох кэпсэтиилэрэ быһа сибээһинэн ыытыллыбыттара. Экэниэмиэкэ, бырамыысаланнас, аныгы технологиялар боппуруостарын сэргэ болҕомто чуолаан доруобуйа харыстабылыгар уонна экологияҕа ууруллубута.
Быйылгы пуорум балаҕан ыйын 5-8 күннэригэр ыытыллыаҕа. «Российская газета» хаһыат суруйарынан, илиҥҥи улахан түһүлгэ быйыл «На пути к многополярному миру» тиэмэнэн салаллыаҕа. Сүрүн болҕомто Уһук Илиҥҥэ олох-дьаһах хаачыстыбатын таһымын үрдэтиигэ туһуланыаҕа. Былырыыҥҥы пуорумҥа Владимир Путин эрэгийиэннэр бөдөҥ куораттарын маастар-былаанын оҥорорго сорудахтаабыта.
Саха Өрөспүүбүлүкэтэ Бэрэсидьиэн сорудаҕын толорон көрүстэ – пуорумҥа Дьокуускай куорат маастар-былаанын уонна «Воинскай» микро-оройуон кэлимник тутуу бырайыагын билиһиннэриэҕэ. Ону таһынан Усуйаанатааҕы хайа бырамыысыланнаһын кластерын сайыннарыы, улуустарга түргэн интэриниэти, үрдүк күүрүүлээх электро-уот ситимин тардыы, Өлүөнэни туоруур муоста о.д.а. бырайыактарын илдьиэҕэ. Өрөспүүбүлүкэ барыта 90 млрд солкуобай суумалаах 30 бииргэ үлэлэһии дуогабарын түһэрсэргэ соруктанар.
-
0
-
0
-
0
-
0
-
0
-
0
