Валентина Березкина дьиэҕэ олорор ийэлэри, эбэлэри, ыччаты көҕүлээн, быстах байыаннай хомуурга ыҥырыллыбыттарга сылгы сиэлинэн киһини харыстыыр, арчылыыр аналлаах, ымыы сахалыы харысхаллары оҥордулар. Кылтан уонна сиэлтэн оҥоһуктар былыр-былыргыттан саха олоҕор олус наадалаах күннэтэ туттуллар маллар быһыыларынан биллэллэр. Бу күн барыта 166 устуука харысхал оҥоһулунна. Салгыы Рожина Надежда Федоровна көмүлүөк оһоҕу күлүбүрэччи уматан, буруолатан, алгыс тылын анаата. Ол курдук, саҥа оҥоһуллубут сахалыы харысхаллар байыаннай хомуурга ыҥырыллыбыт уолаттары араҥаччылыы-харыстыы сылдьалларыгар уонна бары этэҥҥэ эргиллэн кэлэллэригэр алгыс тыла иҥэрилиннэ.
Маны тэҥэ, балыктаахтар мобилизацияҕа ыҥырыллан барбыт биир дойдулаахтарыгар анаан гуманитарнай көмө хомуйдулар. Бары биир киһи курдук, нэһилиэк 109 олохтооҕо, баҕа өттүлэринэн араас наадалаах малы-салы туттардылар. Иистэнэр өттүлэрэ, бэйэ тигии аптечкаларга 12 тыһ. солк. сууммалаах эмп-том арааһын уган ыыттылар.
Мария Захарова, Мэҥэ Хаҥалас улууһа, Балыктаах.
-
6
-
0
-
0
-
1
-
0
-
0
