Ахсынньы 1 күнүгэр Н.И. Харитонов-Николай Чуор аатынан “Кыталык” КД иһинэн үлэлиир кулууп түмсүүтүн салайааччыта Иванова Фекла Ивановна 2018 сылтан буолар “Зимние узоры седого Вилюя” бырайыага төрдүс төгүлүн ыытылынна.
Бырайыак туһунан сырдатар буоллахха, манна Ньурба оройуонун олохтоохторо илиинэн бэйэ оҥоһугу оҥорон, киэҥ араҥаҕа таһааран, кэлэн иһэр Саҥа дьыл чугаһаабытын бэлиэтээһин буолар. Манна уһуйаан сааһыттан саҕалаан, улахан дьоҥҥо тиийэ илиилэригэр талааннаах баҕалаахтар кытталлар.
Тэрээһини Ньурба куоратын “Аленушка” оҕо уһуйаанын “Виноградинки” үҥкүү бөлөҕө арыйда. (сал. А.Г. Седалищева). Н. И.Харитонов-Николай Чуор аатынан “Кыталык” КД салайааччыта Дондокова Самангади Базарсадаевна күрэх сыалын-соругун билиһиннэрэн тыл эттэ, кыттааччыларга ситиһиини баҕарда.
Быйылгы күрэххэ «Креативная игрушка», “Символ года”, “Новогодняя кукла”, “Зимние узоры” номинацияларга 30-чча киһи кыттыыны ылла. Хатыыттан, Күндээдэттэн, Антоновкаттан, Ньурбаттан уһуйаан, оскуола оҕолоро уонна улахан дьон араас кэрэ оҥоһуктарын аҕалан, дьон көрүүтүгэр туруордулар.
Дьүүллүүр сүбэҕэ бырайыак ааптара Иванова Фекла Ивановна, СӨ култууратын туйгуна, Ньурбатааҕы Ускуустуба оскуолатын уус-уран салаатын уһуйааччыта, үрдүк категориялаах учуутал Егорова Алиса Васильевна киирдилэр, дьүүллүүр сүбэ бэрэссэдээтэлинэн Н.И. Харитонов-Николай Чуор аатынан “Кыталык” КД иһинэн үлэлиир ”Хобби-кыласс” салайааччыта Васильева Анна Николаевна үлэлээтэ.
Көрүү түмүгүнэн «Зимние узоры» - кыһыммыт кэрэтин хоһуйар уруһуй күрэҕэр кыайыыны оҕолорго Убайаан орто оскуолатыттан Николаева Ангелия ситистэ. Оттон улахан дьоҥҥо бу номинацияҕа Тимофеева Варвара Николаевна, “Аленушка” оҕо уһуйаанын иитээччитэ, кыайда.
“Креативная игрушка” – Саҥа дьыл симэммит харыйатын киэргэлин, харыйа анныгар ууруллар эбэтэр иилиллэр оонньуурдары көрүүгэ оҕолорго Күндээдэ орто оскуолатыттан Ананьева Катя, улахан дьоҥҥо Семенова Антонина Максимовна, “Аленушка” оҕо уһуйаанын иитээччитэ, бастаатылар.
Күрэхпит үгэс буолбут номинациятыгар, үүнэр 2023 сылбыт бэлиэтэ “Сыл бэлиэтэ” анал аакка, оҕолорго Ньурба куоратын “Туллукчаан” оҕо уһуйааныттан Николаев Никита, улахан дьоҥҥо Ньурбатааҕы бибилэтиэкэ систиэмэтин үлэһитэ Илларионова Марина Олеговна кыайыылаах аатын ыллылар.
“Новогодняя кукла” номинацияҕа оҕолорго Антоновка орто оскуолатыттан Михайлова Нарыйаана, улахан дьоҥҥо Ньурбатааҕы Киин балыыһа үлэһитэ Егорова Нюргуяна Васильевна кыайан үөрдүлэр–көттүлэр. Күндээдэ орто оскуолатын үөрэнээччитэ Габышева-Варламова Айсаана тойон сүбэ анал аатын ылла. Күрэххэ кыттыбыттар бары туоһу сурук туттулар.
Итиэннэ Ньурба куоратын “Аленушка” уһуйаанын оҕолорун, үлэһиттэрин үлэлэрин аҕалан быыстапкаҕа туруоран, кэлбит дьону сөхтөрбүттэрин туспа бэлиэтээн ааһыахпытын баҕарабыт.
-
0
-
0
-
0
-
0
-
0
-
0
