Экспэдииссийэ кыттааччылара бүгүн «Газ-Соболь» уонна «Тойота-Крузер» массыыналарынан Томпо улууһун Хаандыгатыгар тиийиэхтэрэ. Сырыы суол устун норуот маастара Мандар Уус Байаҕантай этнографическай түмэлигэр сылдьыахтара, Таатта улууһун уустарыттан маастар-кылаас ылыахтара. Экспэдииссийэ айан суолун уопсай уһуна - 4 848 км. Айан сырыы икки тымныы полюһу холбуоҕа: Өймөкөөн уонна Үөһээ Дьааҥы.
Бырайыак сыала-соруга: Үөһээ Дьааҥы уонна Өймөкөөн икки тымныы полюһун холбооһун, Аартыка туристическай кыаҕын үөрэтии, Аартыка оройуоннарынан айан сырыы суолугар интэриэһи үрдэтии, ону тэҥэ муниципалитеттары уонна урбаанньыттары кытта сибээһи олохтооһун. Сырыы кэмигэр хоту сир төрүт олохтоох аҕыйах ахсааннаах норуоттарын култууратын уонна айылҕатын туһунан ураты хаартыскалары уонна видеоматырыйааллары түмэн хомуйуохтара. Бу тэрээһин Аартыка оройуоннарыгар туризмы сайыннарыыга туһуланар.
Кыттааччылар састаабыгар «ИнЯкутия» ХЭО дириэктэрэ, бөлөх салайааччыта Михаил Местников, «Туриндустрия Якутии» Ассоциация толорооччу дириэктэрэ Аркадий Дорофеев, өрөспүүбүлүкэҕэ туризмы уонна территориальнай маркетины сайыннарыыга ааҕыныстыба менеджерэ Прокопий Фомин, «Опора России» Саха Сиринээҕи салаатын бэрэссэдээтэлэ Александр Ариносов, «Тоҕус-тур» турфирма бэрэстэбиитэлэ Сергей Ариносов, «Саха-Сириус» ХЭО турфирматын дириэктэрэ Сахаяна Александрова, «Газ-Соболь» суоппара Василий Корнилов, «Тойота-Крузер» суоппара Очир Иванов уонна Казахстаан ыалдьыта Руслан Огай.
Тэрийээччилэр – өрөспүүбүлүкэҕэ туризмы уонна территориальнай маркетины сайыннарыыга ааҕыныстыба, Саха Сирин Туриндустриятын Ассоциацията уонна «Опора России» Саха Сиринээҕи салаата.
Бырайыак уратыта – айан сырыы икки хотугу уонна түөрт Аартыка оройуоннарынан, Үөһээ Дьааҥы, Черскэй сис хайаларынан уонна Сунтар Хайатынан ааһар. Кыһыҥҥы суол 2/3-һэ уһуна Өлүөнэ, Индигир, Дьааҥы өрүстэринэн барар. Айанньыттар оройуон кииннэригэр ыытыллар араас тэрээһиннэр кыттыылаахтарынан буолуохтара: аатырбыт Өймөкөөҥҥө, «Тымныы полюһа – Үөһээ Дьааҥы куората» бэстибээлгэ, Киһилээх хайатыгар тахсыахтара.
Айан сырыы туһунан сиһилии манна билсиһиэххэ сөп:
https://www.inyakutia.ru/tours/avtotury/avtoprobeg-dva-polyusa-kholoda/
Экспедиция бөлөҕүн айан сырыытын манна кэтээн көрүҥ:
https://www.iridium360.ru/guest/journey/ef1e491a
- 0
- 0
- 0
- 0
- 0
- 0