Издательский дом Редакция Подписка
Погода в Якутске: . 28 oC

Өймөкөөн Томторугар Чысхаан Дьиэтигэр «Василий Александрович Местников» кинигэ сүрэхтэниитэ буолан ааста. Кинигэ «Саха киэн туттар дьоно» сиэрийэ иһинэн таҕыста. Презентацияҕа Ил Түмэн салалтата, норуот дьокутааттара, Өймөкөөн улууһун салалтата, дьоно-сэргэтэ, Василий Местников аймахтара кыттыыны ыллылар.

Өймөкөөн Томторугар Чысхаан Дьиэтигэр «Василий Александрович Местников» кинигэ сүрэхтэниитэ буолан ааста. Кинигэ «Саха киэн туттар дьоно» сиэрийэ иһинэн таҕыста. Презентацияҕа Ил Түмэн салалтата, норуот дьокутааттара, Өймөкөөн улууһун салалтата, дьоно-сэргэтэ, Василий Местников аймахтара кыттыыны ыллылар.

Кинигэ Саха Өрөспүүбүлүкэтин народнай дьокутаата, Ил Түмэн V уонна VI ыҥырыытын олохтоох салайыныыга сис кэмитиэтин бэрэссэдээтэлэ, СӨ норуот хаһаайыстыбатын үтүөлээх үлэһитэ, Өймөкөөн улууһун бочуоттаах олохтооҕо Василий Местников төрөөбүтэ 65 сылыгар ананна.

KVA 0013

Президиумҥа Ил Түмэн бүддьүөккэ, үпкэ, түһээн уонна сыана бэлиитикэтигэр сис кэмитиэтин бэрэссэдээтэлэ Юрий Николаев, СӨ Бырабыыталыстыбатын Бэрэссэдээтэлин солбуйааччыта Сергей Местников, Өймөкөөн улууһун баһылыгын эбээһинэһин толорооччута Александр Иванов, Ил Түмэн судаарыстыбаннай тутууга уонна олохтоох салайыныыга сис кэмитиэтин бэрэссэдээтэлэ Владимир Прокопьев, Василий Местников кэргэнэ Валентина Местникова киирдилэр.

Өрөспүүбүлүкэ бырабыыталыстыбатын Бэрэссэдээтэлин солбуйааччыта Сергей Местников бэлиэтээн эппитинэн, Өймөкөөн улууһугар Олоҥхо Ыһыаҕа ыытыллара Василий Александрович көҕүлээһинин, баҕа санаатын туолуута буолар.

KVA 0064

Өймөкөөн улууһун баһылыгын эбээһинэһин толорооччута Александр Иванов кинигэ дьоруойа барыбытыгар холобур буолар диэн этэн туран Өймөкөөн улууһун сайдыытыгар улахан былааннары уонна хайысхалары оҥорон хаалларбытын тоһоҕолоото.

«Сыл бастыҥ үөрэнээччитэ» номинацияҕа Василий Местников аатынан 50 тыһ. солкуобайдаах граны Н.М. Заболоцкай аатынан Үчүгэй нэһилиэгин орто оскуолатын 11 кылааһын үөрэнээччитэ Туйаара Аммосова ылла.

KVA 0068

«Сыл бастыҥ устудьуона» номинацияҕа Василий Местников аатынан 50 тыһ. солкуобайдаах граны М.К. Аммосов аатынан Хотугулуу-Илиҥҥи федеральнай университет устудьуона Тимур Егоров ылла.

Ил Түмэн народнай дьокутаата Владимир Прокопьев бэлиэтээбитинэн, Василий Александрович Местников сыралаах үлэтин түмүгүнэн кыһыл көмүһү уонна сурьманы хостуур бырамыысыланнас балысханнык сайдан барбыта. Ону кытта, социальнай эйгэни сайыннарыыга кини улахан болҕомтону уурбута. «Ол курдук, бэтэрээннэргэ уонна инбэлииттэргэ көмө-өйөбүл миэрэлэри ыларга Василий Местников сүдү кылаатын киллэрбитэ. Онно эбии эттэххэ, Василий Александрович “Ыччаты бырамыысыланнаска” бырайыак көҕүлээччилэриттэн биирдэстэрэ буолар», – диэтэ норуот дьокутаата.

KVA 0086

2002-2012 сылларга диэри Томпо оройуонун баһылыга, 2012-2022 сылларга Томпо оройоунун дьокутааттарын сэбиэтин Бэрэссэдээтэлэ, СӨ народнай хаһаайыстыбатын үтүөлээх үлэһитэ, Томпо оройуонун бочуоттаах олохтооҕо Илья Шадрин доҕорун Василий Александрович туһунан кэпсээтэ. Кини бырабыыталыстыба чилиэннэригэр, кэллиэгэлэригэр, Ил Түмэн дьокутааттарыгар кинигэ презентациятын тэрийбиттэригэр махтанна уонна Олоҥхо Ыһыаҕа Василий Местников 65 сылыгар түбэспитин улахан суолталааҕын эттэ.

KVA 0091

Өймөкөөн улууһун 2-с Бороҕон нэһилиэгин баһылыга Алексей Винокуров кэллиэгэтэ Василий Александровичтыын бииргэ үлэлэспитин ахтан аһарда уонна бэйэтэ туттарбыт Чысхаан Дьиэтигэр кини туһунан кинигэ сүрэхтэнэрэ сүдү суолталааҕын бэлиэтээтэ. «Ыарахан боппуруостар турдахтарына, Василий Александрович хаһан даҕаны уолуйбат этэ. Хаһан баҕарар оттомноохтук толкуйдаан, үп-харчы булан үлэтин тиһэҕэр тиэрдэрэ», – диэн үллэһиннэ нэһилиэк баһылыга.

Ил Түмэн сир сыһыаннаһыытыгар, айылҕа баайыгар уонна экологияҕа сис кэмитиэтин бэрэссэдээтэлэ, 34 №-дээх Халыма-Индигир быыбардыыр уокуругуттан СӨ народнай дьокутаата Сахамин Афанасьев кэллиэгэтэ Василий Александрович элбэх идиэйэлэрдээх, былааннардаах, бырайыактардаах этэ, олор бары олоххо киирбиттэрэ диэн эттэ. Сахамин Афанасьев кинигэ тахсыытыгар үлэлэспит дьоҥҥо барыларыгар барҕа махталын биллэрдэ.

KVA 0240

2016-2021 сылларга 2-с Бороҕон нэһилиэгин баһылыга, 2-с Бороҕон нэһилиэгин бочуоттаах олохтооҕо Никифор Протопопов Олоҥхо Ыһыаҕын чэрчитинэн сүрдээх үчүгэй кинигэ сүрэхтэниитэ буола турарынан бар дьону эҕэрдэлээтэ.

РФ үтүөлээх учуутала, РФ уопсай үөрэхтээһинин бочуоттаах үлэһитэ, СӨ Учууталларын учуутала, СӨ култууратын туйгуна, Өймөкөөн улууһун бочуоттаах олохтооҕо Мария Боярова Василий Александрович киһи быһыытынан сэмэйин, көрсүөтүн, ис-иһиттэн култууралааҕын бэлиэтээтэ итиэннэ кинигэни таһаарарга көмөлөспүт дьоҥҥо дириҥ махталын тиэртэ.

KVA 0336

СӨ култууратын үтүөлээх үлэһитэ, Өймөкөөн улууһун бочуоттаах олохтооҕо Розалия Готовцева Василий Александрович туһунан кинигэ, бастатан туран, ыччакка анаммытын уонна эдэр дьон кинини холобур оҥостуохтаахтарын тоһоҕолоон эттэ. «Маннык дьонунан киэн туттуохха, маннык дьон туһунан кинигэ суруйуохха наада. Ыччакка, оскуолаҕа бу кинигэни хайаан да тириэрдиэх тустаахпыт, оччоҕо оҕолорбут патриот буола улаатыахтара», – диэтэ Розалия Готовцева.

Василий Александрович бииргэ төрөөбүт убайа Александр Местников быраатын туһунан кинигэ тахсыбытынан дьону-сэргэни эҕэрдэлээтэ уонна кинигэ тахсарыгар күүс-тирэх буолбут дьоҥҥо махтанна.

Аймахтар ааттарыттан «Железные дороги Якутии» АО генеральнай дириэктэрин солбуйааччыта Алексей Местников абаҕата Василий Александрович олоҕун араас кэрдиистэригэр киниэхэ сүбэ-ама буолбутун, көмөлөспүтүн туһунан кэпсээтэ уонна бу кинигэ ыччаты патриотизмҥа көҕүлүөхтээҕин эттэ.

KVA 0459

Валентина Местникова кэргэнэ Василий Александрович дьиэ кэргэнигэр наһаа сымнаҕас, боростуой майгылаах, чараас дууһалаах, үлэтигэр кыһамньылаах этэ диэн аҕынна. «Ыраах хомондьуруопкаҕа сырыттаҕына, мэлдьи сибээскэ сылдьар этибит. Дьиэтин олус ахтара. Дьиэтин иһигэр барытын бэйэтэ илиитинэн оҥорооччу. Биһигини үөрдэрин, санаабытын көтөҕөрүн сөбүлүүрэ». Валентина Николаевна ыраахтан кэлбит Василий Александрович кэллиэгэлэригэр уонна доҕотторугар улахан махталын эттэ.

  • 1
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением
Лента новостей

Сылгы тумнастар бырдаҕа

Орто Халыма улууһугар иккис сылын хараан бырдах түһэн, сүөһүгэ, сылгыга олус ыарахан…
23.07.24 14:51