Араас улуустартан барыта 113 сайабылыанньа киирбитин экспертнэй хамыыһыйа көрөн-истэн баран, ирдэбил быһыытынан толору хомуллубут докумуоннардаах 103 киһини куонкуруска киллэрдэ. Бизнес-бырайыактары көмүскээһин министиэристибэҕэ бүгүн уонна сарсын ыытыллар.
-- Хас биирдии киһиэхэ 5-10 мүнүүтэ бэриллэр. Экспертнэй хамыыһыйа чилиэннэрэ бизнес-бырайыактары кытары эрдэ билсибит буоланнар, көмүскээһин ыйытыыларга харда киэбинэн ыытыллар. Итинэн куонкуруска кыттааччы былааннаабыт дьыалатын төһө иҥэн-тоҥон билэрэ, уопуттааҕа быһаарыллар. Оттон куонкуруска кыттааччы бырайыагын кыайан көмүскээбэт, ыйытыыларга толору хоруйдаабат, ситэтэ суох харданы биэрэр түбэлтэтигэр, хамыыһыйа баалын түһэрэр кыахтаах, – диэн быһаарар министиэристибэ Сүөһүнү иитиигэ, племенной үлэҕэ, кэпэрээссийэҕэ итиэннэ бааһынай хаһаайыстыбаларга департаменын салайааччыны солбуйааччы Айаал Тимофеев.
Санатан эттэххэ, «Агростартап» гранын куонкуруһа «Дьоҕус уонна орто урбаан итиэннэ биирдэм урбаан көҕүлээһинин сайыннарыы» национальнай бырайыак чэрчитинэн ыытыллар. 2019-2022 сс. бу гранынан 390 мөл. солк. көрүллэн, 131 эдэр пиэрмэр тыа хаһаайыстыбатын үлэтин-хамнаһын араас көрүҥүн тэрийдэ. Быйыл бу сыалга 92,2 мөл. солк., ол иһигэр федерацияттан 33,3 мөл. солк. көрүлүннэ.
-
1
-
0
-
0
-
0
-
0
-
0
