1945 с. ыам ыйын 1 күнүгэр Берлин куоракка рейхстаг үрдүгэр Кыһыл Аармыйа саллааттара Михаил Егоров, Мельтон Кантария уонна Алексей Берест Кыайыы Знамятын көтөхпүттэрэ. Бу былааҕы күөрэччи тута сылдьан биһиги эһэлэрбит-хос эһэлэрбит Аҕа дойдуну өстөөх саба түһүүтүттэн кыа хааннарын тоҕон, сорохтор олохторун толук ууран туран көмүскээбиттэрэ. Сыл-хонук ааспытын да иһин Кыайыы Знамята төрөөбүт дойдуга бэриниилээх, хорсун буолууну кэрэһэлиир.
Арассыыйа уонна Саха Сирин өрөгөйүн ырыатын кэнниттэн эҕэрдэ тылы СӨ Бырабыыталыстыбатын бэрэссэдээтэлин солбуйааччы Ольга Балабкина эттэ.
Ил Түмэн билимҥэ уонна үөрэххэ сис кэмитиэтин бэрэссэдээтэлэ Антонина Григорьева бэтэрээннэри Улуу Кыайыы күнүнэн эҕэрдэлээтэ.
«Эһиил Кыайыы 80 сылын бэлиэтиэхпит. Биһиги дойдубут устуоруйатыгар саамай кырыктаах сэриигэ Германия фашизмын кыайбыппыт. Күн бүгүн үтүө үгэстэри харыстыыр, үйэтитэр бука бары ытык иэспит, кэнэҕэс көлүөнэҕэ күүстээх, тутулуга суох Арассыыйаны биэриэхтээхпит», — диэтэ Антонина Григорьева.
Дьокуускай куорат баһылыга Евгений Григорьев Кыайыы Знамята омугуттан, сааһыттан тутулуга суох бары норуоттарга киэн туттар бэлиэ буоларын туһунан санатта. Кини Улуу Кыайыыны уһансыбыт саллааттары, тыыл үлэһиттэрин үйэлэргэ умнубакка өйдөбүнньүк оҥосторбут тухары биһиги норуоппут өрүү кыайыылаах-хотуулаах буоларын бэлиэтээтээтэ.
Ааптар уонна Василий Кононов хаартыскаҕа түһэриилэрэ.
-
0
-
0
-
0
-
0
-
0
-
0
