Уу киирбит дьиэлэриттэн олохтоохтор бары куттала суох сирдэргэ, эвакопууннарга көһөрүллүбүттэр. Ону сэргэ, тыа хаһаайыстыбатын улуустааҕы управлениета иһитиннэрбитинэн, өрүскэ сытар нэһилиэктэргэ ыам ыйын 13 күнүнээҕи туругунан, 1 287 ынах сүөһү, 1 716 сылгы үөһэ, уу ылбат сиригэр таһаарыллыбыт. Ол эрээри, хоромньу суох буолбатах – Кыыллаах арыыга 28 сүөһү ууга былдьаммыт. Бу нэһилиэккэ 754 ынах сүөһү, 649 сылгы быстах хаайар пууҥҥа таһаарыллыбыт, уу ааһар кэмигэр сөп буолар от-бурдук онно эрдэттэн бэлэмнэммит. Хаһаайыстыбалар ынахтарын ыан, үүттэрин «Кыыллаах» кэпэрэтиипкэ туттара олорор эбиттэр.
– Уу ылыан сөптөөх нэһилиэктэригэр: Өлүөнэ өрүскэ (Ленскэй, Өлүөхүмэ, Хаҥалас, Нам улуустарыгар), Алдан өрүскэ (Алдан, Уус Маайа, Томпо, Таатта, Уус Алдан улуустарыгар), Амма өрүскэ (Амма, Чурапчы уонна Таатта улуустарыгар) күн бүгүҥҥү туругунан, барыта 4 986 ынах сүөһү уонна 7 826 сылгы куттала суох сирдэргэ таһаарылынна. Уу хайдах кэлэриттэн көрөн, быстах пууннарга хаайаллар. Атын улуустарга билиҥҥитэ балаһыанньа этэҥҥэ курдук буоллаҕына, Өлүөхүмэҕэ сүтүк баар, онно хамыыһыйалар үлэлии, аах оҥоро сылдьаллар, – диир тыа хаһаайыстыбатын миниистирин солбуйааччы Николай Афанасьев.
Хоро нэһилиэгин олохтооҕо Антонина Лыткина бу сарсыарда маннык кэпсээтэ:
– Биһиги нэһилиэккэ Екатерина Габышева диэн 1940-с сыллартан саҕалаан күнү-дьылы билгэлээбит, муус барыытын бэлиэтээбит эдьиий баара. Кини өрүс эрдэ, уутун-хаарын тардына илигинэ, ол эбэтэр уу аҕыйах кэмигэр муус хамсаатаҕына, харыы үөскүүр диирэ. Быйыл оруобуна оннук көстүү буолла: кыһын хаар халыҥ этэ, халлаан тымныы буолан, сискэ билигин да сытар, мыраан уута киирэн иһэн тарта. Инньэ гынан ити харыы буолла. Бөһүөлэк аллараа уулуссатын икки эҥээрин, өрүс диэки өттүнээҕи ыаллар дьиэлэрин ылан баран, бэҕэһээ киэһэ түспүтэ.
-
0
-
0
-
0
-
0
-
0
-
0