Ыам ыйын 28 күнүгэр Ил Түмэн уочарата суох сэттис пленарнай мунньаҕар дьокутааттар бэбиэскэ быһыытынан, тоҕус боппуруоһу көрүөхтээхтэрин, биири уһуллулар.
Бастакытынан, Ил Дархан Айсен Николаев киллэрбит өрөспүүбүлүкэҕэ элбэх оҕолоох дьиэ кэргэн туһунан СӨ сокуонугар уларытыылары киллэрэр туһунан сокуон барылын бастакы уонна иккис бүтэһик ааҕыыга ылыннылар. Бу боппуруоска иһитиннэрии дакылаат оҥоһуллубата, онон сокуон барылын хаһыстахха, элбэх оҕолоох дьиэ кэргэн анал туруга болдьоҕо суох олохтонор. Өскөтүн элбэх оҕолоох ыал үстэн элбэх оҕото сокуоннай сааһын туола илик түгэнигэр, социальнай өйөбүл улаханнара 18 сааһын, эбэтэр ол оҕо күнүскү үөрэххэ үөрэнэр кэмигэр 23 сааһын туолуор диэри оҥоһуллар. Үс оҕоттон улаханнара 18 сааһын, эбэтэр устудьуон оҕо 23-үн туоллаҕына, элбэх оҕолоох дьиэ кэргэҥҥэ көрүллэр көмө тохтуур.
СӨ Сиргэ кодексынан, элбэх оҕолоох ыал оҕолоро 18 саастарын туолуохтарыгар диэри, итиэннэ күнүскү үөрэххэ үөрэнэр, ыал буола илик оҕолоро 25 сааһыгар диэри босхо сир учаастага бэриллэр.
Анал байыаннай дьайыыга кыттыбыт биир, эбэтэр хас даҕаны оҕолоро олохтон туораабыт түбэлтэтигэр кыра оҕолоро сокуонунан быһаарыллыбыт сааһын туолуор диэри элбэх оҕолоох дьиэ кэргэҥҥэ көрүллэр социальнай өйөбүл тохтотуллубат. Элбэх оҕолоох дьиэ кэргэҥҥэ социальнай өйөбүл дьаһалын оҥоруу бэрээдэгэ, кээмэйэ уонна усулуобуйата өрөспүүбүлүкэ сокуоннарынан олохтонор.
Саха Сиригэр сыл аайы элбэх оҕолоох ыал эбиллэ турар, кинилэр ахсааннара 2024 с. 34 300 тиийбит, оҕолорун ахсаана 118 050. Элбэх оҕолоох дьиэ кэргэн ахсаанын тутулугар 69,6% үстүү оҕолоохтор.
Ил Түмэн социальнай бэлиитикэҕэ, үлэҕэ уонна дьарыктаах буолууга сис кэмитиэтин бэрэссэдээтэлэ Алена Атласова быһааран биэрбитинэн, РФ Бэрэсидьиэнин Владимир Путин быйыл тохсунньу 23 күнүгэр тахсыбыт ыйааҕын олоххо киллэрэр сыалтан, элбэх оҕолоох дьиэ кэргэн туһунан сокуоҥҥа уларытыылар киирэллэр. Элбэх оҕолоох дьиэ кэргэн биир кэлим быраабын статуһа дойду үрдүнэн олохтонор, кинилэр кэккэ социальнай өйөбүлүнэн туһаныахтара.
Бу уларытыылар чэрчилэринэн, дойду ханнык баҕарар эрэгийиэнигэр элбэх оҕолоох ыаллар култуура уонна успуорт уораҕайдарыгар, пааркаларга, сынньанар кииннэргэ сылдьарга болдьоҕо суох чэпчэтиилээх билиэтинэн, оҕолору улаатыннарарга харчынан өйөбүлүнэн туһаныахтара.
Василий Кононов хаартыскаҕа түһэриитэ.
- 0
- 0
- 0
- 0
- 0
- 0