Күн муҥутаан уһаан турар кэмигэр Амма ытык түһүлгэтигэр түүннэри-күнүстэри тохтообокко олоҥхо, оһуохай, тойук дьиэрэйдэ, ахсаана биллибэт араас тэрээһин утуу-субуу ыытылынна, уонунан тыһыынчалаах ыалдьыт хотоҕостуу субуллан олордулар. Саха Сирэ саайт суруйарынан, Ыһыаҕы сабыы үөрүүлээх түгэнигэр, үгэс курдук, толору тырыбыына киһи муһунна.
Олоҥхо тыйаатыра Күннүк Уурастыырап «Нуоралдьын Кугас аттаах Тойон Дьаҕарыма Бухатыыр» олоҥхотун көрдөрдүлэр. Бу олоҥхону бу ыһыахха үс кэлэктиип — Олоҥхо тыйаатыра, Алтаннааҕы норуот тыйаатыра уонна АГИКИ устудьуоннара туруорбуттара. Онон үс өттүттэн көрүү интэриэһинэй буолла.
Амма улууһун баһылыга Степан Кузьмин:
— Өр кэмҥэ бэлэмнэммит ыһыахпыт түмүктэнэр чааһа кэллэ. 90-ча араас тэрээһин буолла. Аммабытыгар олус элбэх ыалдьыт тоҕуоруһан, ыһыахпытын киэргэттилэр. Холобур, тимир уустарын күрэһэр хаһан да бачча элбэх мустубатах 60 уус кытынна, — диэн туран, баһылык дьонугар-сэргэтигэр, нэһилиэктэр баһылыктарыгар, тустаах министиэристибэлэргэ махтанна. Ыһыах чэрчитинэн, былааҥҥа киирбит 19 эбийиэк, ону таһынан 20-чэ эбийиэк тутуллубут.
Хаартыскалар Саха Сирэ саайтан ылылыннылар
Үс күн устата барбыт күрэстэр саха төрүт култуурата, ийэ тылбыт, үгэстэрбит сүппэттэрин, үйэлэри уҥуордаан, үүнэр көлүөнэлэргэ бэриллэ туралларыгар туһуланан ыытылыннылар.
Ол курдук, Аммаҕа ыытыллыбыт Олоҥхо ыһыаҕын кыайыылаахтара ааттаннылар. Олоҥхоһуттарга «Кылаан чыпчаал» бирииһин оҕолорго Амма Бөтүҥүттэн Сандаара Слепцова, ыччаттарга Чурапчыттан Александра Алексеева ыллылар, улахан дьоҥҥо Чурапчыттан Анатолий Христофоров ылан, 700 тыһыынча солкуобайдаах сэртипикээтинэн бириэмийэлэннэ. Хомусчуттарга Кылаан кыайыылаах аатын Ньурбаттан Валерий Платонов ылла. Оһуохайга Үөһээ Бүлүүттэн Розанна Герасимова кыайыылаах аатын ылла.
Кэлэр 18-с Олоҥхо ыһыаҕа Нерюнгригэ Таастаах диэн сиргэ ыытыллыа. Ыһыах Ытык дуоҕатын Амма баһылыга Степан Кузьмин Нерюнгри оройуонун баһылыга Роман Щегельнякка үөрүүлээх быһыыга-майгыга туттарда.
Роман Щегельняк:
— Олоҥхо ыһыаҕын үрдүк таһымҥа ыыппыккытыгар, биһиэхэ итэҕэйбиккитигэр махтанабын. Биһиги наһаа баҕарабыт, наһаа кыһаллабыт, ол эрээри бу курдук таһымҥа ыытарбыт уустук буолуо диэн долгуйабыт! — диэтэ.
Түмүккэ «Кыыс Амма» ырыаны бука бары тэҥҥэ ыллаһан, толордулар…
Хаартыскалар Саха Сирэ саайтан ылылыннылар
-
0
-
0
-
0
-
0
-
0
-
0
